منی پور میں درجنوں قبائلی عسکریت پسند ہلاک

امپھال،30مئی :شمال مشرقی ریاست منی پور کے وزیر اعلیٰ این بیرن سنگھ نے بتایا کہ سکیورٹی فورسز نے امپھال وادی میں منظم کارروائی کرتے ہوئے کم از کم 40 کوکی قبائلی عسکریت پسندوں "کو ہلا ک کردیا۔اس سے قبل اتوار کے روز تشدد کے دوران ایک سکیورٹی اہلکار اور چار سویلین مارے گئے تھے۔ پیر کے روز بھی تشدد کے واقعات میں ایک شخص ہلاک ہو گیا۔ تین مئی سے شروع ہونے والے تصادم کے دوران اب تک تقریباً 80 افراد ہلاک اور 200 سے زائد زخمی ہو چکے ہیں جب کہ 40 ہزار سے زائد بے گھر ہو گئے ہیں۔وزیر اعلیٰ سنگھ نے مقامی میڈیا سے بات چیت کرتے ہوئے کہا کہ سکیورٹی فورسز نے شہریوں کو نشانہ بنانے والے درجنوں عسکریت پسندوں کو ہلاک کر دیا ہے۔ انہوں نے کہا، "دہشت گرد شہریوں کے خلاف ایم 16 اور اے کے 47 اسالٹ را ئفلوں کا استعمال کر رہے ہیں۔ وہ گھروں کو جلا رہے تھے۔”انہوں نے مزید کہا، "ہم نے فوج اور دیگر سکیورٹی فورسز کی مدد سے ان کے خلاف بہت سخت کارروائی شروع کر دی ہے۔ ہمیں اطلاعات ملی ہیں کہ تقریباً 40 دہشت گردوں کو گولی مار کر ہلا ک کر دیا گیا ہے۔” وہیںمرکزی وزیر داخلہ امت شاہ، جو کہ تشدد سے متاثرہ منی پور میں امن بحال کرنے کے مقصد کے ساتھ منی پور کے دورے پر ہیں، نے منگل کے روز خواتین لیڈروں کے ایک گروپ کے ساتھ ناشتے کی میٹنگ کے ساتھ کئی اسٹیک ہولڈرز کے ساتھ مشاورت کی۔ وزیر داخلہ نے لوگوں تک پہنچنے کی اپنی مہم کے ایک حصے کے طور پر سول سوسائٹی کی تنظیموں کے ایک وفد کے ساتھ ایک میٹنگ بھی کی۔ اس دوران وزیر اعلیٰ این بیرن سنگھ بھی موجود تھے۔اس سے قبل، انہوں نے اس ماہ کے شروع میں فسادات سے سب سے زیادہ متاثرہ علاقوں میں سے ایک چورا چاند پور کا بھی دورہ کیا۔ دریں اثنا، امپھال میں کرفیو میں نرمی کے دوران لوگ اشیائے ضروریہ کی خریداری کے لیے گھروں سے باہر نکل آئے۔ خویرام بند بازار میں لوگوں کی نقل و حرکت معمول کے مطابق دیکھی گئی۔مرکزی وزیر شاہ پیر کی رات ہوائی جہاز سے امپھال پہنچے ہیں۔ ہوم سیکرٹری بھی ان کے ساتھ تھے۔ شاہ نے پیر کی دیر رات وزیر اعلیٰ این بیرن سنگھ کو فون کرکے صورتحال کا جائزہ لیا۔ بیرن سنگھ، ان کے کابینہ کے کچھ ساتھیوں، انٹیلی جنس اور سیکورٹی حکام کے ساتھ میٹنگ کی۔ ذرائع نے بتایا کہ میٹنگ میں شمال مشرقی ریاست میں اشیائے ضروریہ کی قیمتوں کو کم کرنے کے لیے کئی امدادی اقدامات اور سپلائی بڑھانے جیسے اقدامات کا فیصلہ کیا گیا۔ اس ماہ کے شروع میں ریاست میں نسلی تشدد کے بعد سے یہاں ضروری اشیاء کی قیمتوں میں اضافہ ہوا ہے۔منی پور میں نسلی تشدد پھوٹنے کے بعد شاہ کا ریاست کا یہ پہلا دورہ ہے۔ ذرائع نے بتایا کہ مرکزی وزیر داخلہ میتئی اور ککی کمیونٹی کے لوگوں کے ساتھ بھی میٹنگ کر سکتے ہیں۔ ان میں سے بہت سے پڑوسی ریاستوں میں جا چکے ہیں لیکن ان کے مذاکرات میں شرکت کے لیے آنے کا امکان ہے۔ ککی برادری کے لوگ جس ضلع میں رہتے ہیں اس کے لیے علیحدہ انتظامیہ کا مطالبہ کر رہے ہیں، جس میں ناکام ہونے پر انہوں نے ریاست میں صدر راج نافذ کرنے کا مطالبہ کیا ہے۔منی پور تقریباً ایک ماہ سے نسلی تشدد سے متاثر ہے اور اس دوران ریاست میں جھڑپوں میں اضافہ دیکھا گیا ہے۔
چند ہفتوں کی خاموشی کے بعد اتوار کو سیکورٹی فورسز اور عسکریت پسندوں کے درمیان فائرنگ کا تبادلہ ہوا۔ حکام کے مطابق 3 مئی کو یہاں ذات پات کے فسادات شروع ہونے کے بعد سے فسادات میں مرنے والوں کی تعداد 80 ہو گئی ہے۔ ایک اہلکار نے بتایا کہ فوج اور نیم فوجی دستے امپھال وادی اور ملحقہ اضلاع میں تلاشی مہم چلا رہے ہیں۔منی پور میں ‘قبائلی اتحاد مارچ’ کے بعد منی پور میں پہلی بار نسلی تشدد پھوٹ پڑا۔ 3 مئی کو میتئی برادری نے شیڈول کاسٹ (ایس ٹی) کا درجہ دینے کے مطالبے کے لیے احتجاج کیا، جس کے بعد ‘قبائلی اتحاد مارچ’ کا اہتمام کیا گیا۔ ککی دیہاتیوں کو محفوظ جنگلاتی اراضی سے بے دخل کرنے پر کشیدگی ماضی میں تشدد کی صورت میں نکلی تھی، جس کے نتیجے میں کئی چھوٹی چھوٹی تحریکیں شروع ہوئیں۔ میتئی کمیونٹی منی پور کی آبادی کا تقریباً 53 فیصد ہے اور زیادہ تر کمیونٹی وادی امپھال میں رہتی ہے۔ ناگا اور ککی کمیونٹیز کل آبادی کا 40 فیصد ہیں اور پہاڑی اضلاع میں رہتے ہیں۔