دوسہ، 11ون : راجستھان کے سابق نائب وزیر اعلیٰ اور کانگریس لیڈر سچن پائلٹ نے اپنے والد کو اپنا رول ماڈل بتاتے ہوئے کہا ہے کہ وہ اپنی عزت نفس اور نظریات پر کبھی سمجھوتہ نہیں کریں گے اور بدعنوانی اور نوجوانوں کے امور پر کبھی پیچھے نہیں ہٹیں گے اور ان کی لڑائی جاری رہے گی۔مسٹر پائلٹ نے آج یہ بات دوسہ شہر کے گرجر ہاسٹل میں اپنے والد اور سابق مرکزی وزیر راجیش پائلٹ کے مجسمے کی نقاب کشائی کے بعد ایک جلسہ عام سے خطاب کرتے ہوئے کہی۔ انہوں نے کہا کہ سیاست میں سوچ، ہدف اور نظریہ مختلف ہو سکتا ہے لیکن سیاست کا اجتماعی مقصد واضح ہونا چاہیے اور میری سیاسی سوچ واضح ہے اور اپنے والد کی پیروی کرتے ہوئے میں نے ہمیشہ نوجوانوں کے مفاد کی بات کی ہے ، ملک اور معاشرے سے بدعنوانی کے خاتمے اور نوجوانوں کے لیے روزگار کی بات کی ہے ۔انہوں نے کہا کہ آج سیاست پر بات کرنے کا وقت نہیں ہے ، اس لیے وہ اس پلیٹ فارم سے سیاست پر بات نہیں کریں گے ، لیکن ریاست کے لوگوں کو انصاف ضرور ملے گا۔ اس کے ساتھ انہوں نے واضح کیا کہ وہ بدعنوانی اور نوجوانوں کے معاملے پر پیچھے نہیں ہٹیں گے اور ان کی لڑائی جاری رہے گی۔ انہوں نے کہا کہ کسی نے ٹھیک کہا ہے کہ ہر غلطی سزا مانگتی ہے ۔ اس بات سے کوئی فرق نہیں پڑتا ہے کہ ہم ایک دوسرے سے کیسے تعلق رکھتے ہیں، سب سے بڑا انصاف نیلی چھتری والا دیتا ہے ۔ آج نہیں تو کل انصاف ضرور ہوگا۔انہوں نے کہا کہ اگر ہم غریبوں کی مدد کرتے ہیں تو مرکزی حکومت کہتی ہے کہ ہم مالی طور پر دیوالیہ ہو جائیں گے اور اگر میں ان نوجوانوں کی مدد کروں گا جن کو دھوکہ دیا گیا ہے تو وہ کہتے ہیں کہ ہم ذہنی طور پر دیوالیہ ہو جائیں گے ۔ غریب نوجوان کی مددکرنے کے لئے بڑا دل ہونا چاہیے ۔ خزانہ ہمارے پاس ہے کہ ان کی ہم مدد کریں۔اس موقع پر لوگوں کی بڑی تعداد جمع تھی۔ قبل ازیں مسٹر پائلٹ نے بھنڈنا میں مسٹر راجیش پائلٹ کی یادگار پر پھول چڑھا کر خراج عقیدت پیش کیا۔اس موقع پر ایک کل مذہب دعائیہ اجلاس کا بھی اہتمام کیا گیا جس میں طب کے وزیر پرسادی لال مینا، خوراک اور شہری سپلائی کے وزیر پرتاپ سنگھ کھچاریاواس، وزیر جنگلات ہیمارام چودھری، خواتین اور اطفال کی ترقی کی وزیر ممتا بھوپیش اور زرعی مارکیٹنگ کے وزیر مملکت مراری لال مینا، سابق اسمبلی اسپیکر دیپیندر سنگھ شیخاوت، ایم ایل اے اوم پرکاش ہڈلا، مکیش بھاکر، رامنیواس گواڈیا اور کئی دیگر ایم ایل ایز نے شرکت کی۔
