ملک ہی نہیں بیرون ملک میں بھی یونانی طریقہ علاج کی ضرورت

نئی دہلی14 جون ،سماج نیوز سروس: یونانی دواساز اداروں کی تنظیم یونانی ڈرگس مینوفیکچررس ایسوسی ایشن (اْڈما) کی گورننگ باڈی کی میٹنگ زیرِ صدارت حامد احمد ہمدرد لیباریٹریز انڈیا (فوڈ ڈویزن) آفس میں ہوئی جس میں محسن دہلوی (جنرل سکریٹری)، محمّد عارف (پیٹرون)، مقبول حسن (پیٹرون)، محمّد نبیل (وائس پریسیڈنٹ)، ڈاکٹر مطیع اللّٰہ مجید (ریجنل وائس پریسیڈنٹ)، محمّد نوشاد (کوارڈینیٹر)، پرویز احمد خاں (نائب خزانچی )، سیّد منیر عظمت، حکیم عذیر بقائی، حکیم محمّد خبیب بقائی، ڈاکٹر محمّد کاشف ذکائی شریک تھے جبکہ ورچوول موڈ پر شیخ انتخاب عالم (پونے؛ ریجنل وائس پریسیڈنٹ)، ارون شریواستو (کانپور)، ڈاکٹر شاہد بخش (برہانپور) اور انتخاب عالم آرزو (کولکتہ) پروگرام سے منسلک تھے۔ میٹنگ میںجو اہم تجاویز پاس کی گئیںان میں طب یونانی کے فروغ کے لیے سابقہ راؤنڈ ٹیبل کانفرنس میں شریک تعلیمی اداروں کے اساتذہ و ذمّہ داران نے جو باتیں اور مسائل رکھے تھے انہیں تحریری طور پر کتابی شکل دی جائے تاکہ یونانی دوا ساز تعلیمی اداروں کے درمیان مستقل رابطے برقرار رہیں اور باہمی تعلقات کو مزید مستحکم بنایا جا سکے ساتھ ہی طالب علموں کو یونانی دواؤں کے بارے میں زیادہ سے زیادہ معلومات فراہم ہوں، ان کے اندر خود اعتمادی پیدا ہو اور وہ اپنی پریکٹس میں یونانی دواؤں کو شامل کر سکیں۔ملک کے مختلف خطّوں میں یونانی کے پروگرامس، کانفرنس، نمائش، بحث و مباحثہ و تقریبات کے انعقاد و اہتمام اور ان میں اْڈما کے اراکین کی شرکت کو یقینی بنایا جائے۔اگلا یومِ اْڈما دہلی کے علاوہ دیگر بڑے شہروں مثلاً ممبئی، حیدرآباد، بنگلور، کولکتہ، پٹنہ میں اہتمام کیا جائے، ملک کے دیگر اہم مقامات پر بھی انعقاد کیا جائے تاکہ ملک گیر سطح پر اس طریقہ علاج کو بہتر پہچان ملے اور اہلیانِ طِب نیز عوام الناس تک بطریق احسن ہمارا پیغام پہنچے۔ جنرل سکریٹری محسن دہلوی نے اپنے حالیہ ملک ایران اور دبئی کے دورہ کے بارے میں بتایا انہوں نے دونوں ممالک میں قدرتی اجزا سے تیار شدہ ادویہ، ان کی افادیت نیز جڑی بوٹیوں اور کاروباری امور کے ساتھ ساتھ مستقبل قریب میں وہاں تک ہماری دواؤں کی رسائی کے تعلق سے تفصیلی گفتگو کی۔اسکے علاوہ سالانہ کیلنڈر تیار کیا جائے گا جس میں طب یونانی کے تعلق سے ہونے والی کانفرنس، نمائش اور دیگر پروگرامس کے بارے میں جانکاری دی جائے گی۔ حکومت سے ہمارا مطالبہ ہے کہ آیورویدک آہار کی طرح یونانی آہاربھی ہونا چاہیے۔تنظیم کے صدر حامد احمد نے سنٹرل کاؤنسل فار ریسرچ اِن یونانی میڈیسن، وزارات آیوش حکومت ہند میں نئے ڈائریکٹر جنرل ڈاکٹر ظہیر احمد کو اراکین اْڈما کی جانب سے مبارکباد پیش کی۔پدم شری حکیم خلیفتہ اللّٰہ صاحب کی رحلت پر افسوس کا اظہار کیا گیا۔ مرحوم کے لئے دعاء مغفرت کی گئی ۔ شرکاء حضرات نے اس بات کو پھر دہرایا کہ موجودہ صورتحال میں یونانی فزیشینز کو ملک گیر سطح پرخالص یونانی پیتھی کی جانب مائل کرنے کے لئے ذہن سازی مہم نہایت ضروری ہے جو انقلابی تحریک کی شکل میں تسلسل کے ساتھ چلتی رہے گی۔جنرل سکریٹری حکیم محسن دہلوی نے سبھی شرکاء کا شکریہ ادا کیا۔