حج اسلام کا ایک اہم رکن ہے اور اس رکن کی ادائیگی کیلئے پوری دنیا سے مسلمان حرمین شریفین کا سفر کرتے ہیں لاکھوں کے اس بے مثال مجمع کو سنبھالنا اور ارکان حج کی ادائیگی میں انکو راحت پہنچانا اور انکی صحت کا خیال رکھنا کوئی آسان کام نہیں ہے ۔لیکن سعودی حکومت اس دوران جس خوبی اور حسن انتظام کا مظاہرہ کرتی ہے وہ نہ صرف لایق تحسین ہے بلکہ اس سے بہتر انتظام وانصرام کا تصور بھی نہیں کیا جاسکتا ہے ۔سعودی حکومت کی جانب سے حج کی تیاری کاعمل پورے سال جاری رہتا ہے وہاں کی وزارتِ حج وزارت شؤن اسلامیہ اور وزارت صحت کے ساتھ ساتھ پوری حکومت اس کام میں مصروف رہتی ہے ۔
ایام حج میں حجاج کی بے پناہ بھیڑ کے اندر سب سے زیادہ اس بات کی ضرورت ہوتی ہے کہ حاجیوں کی صحت اور انکے علاج ومعالجہ کا خیال رکھا جائے اس بارے میں بطور نمونہ سعودی حکومت کی بے مثال محنت اور خدمت کا اندازہ اس بات سے لگایا جا سکتا ہے کہ مکہ مدینہ اور مشاعر مقدسہ میں پہلے سے موجود سیکڑوں مستقل اسپتالوں کے علاوہ 32 ہنگامی طبی خدمات فراہم کرنے والے اسپتال اور 140 طبی مراکز بنانے گیے ہیں جن میں عام مریضوں کے لیے 6132 بیڈ انتہائی نگہداشت والے مریضوں کے لیے 761 بیڈ اور سن اسٹروک یعنی لو لگنے والے مریضوں کے لیے 222 بیڈ مختص کیے گئے ہیں ۔ اسکے علاوہ مشاعر مقدسہ میں چلنے والی ٹرینوں میں میڈیکل پوائنٹس اور پیدل چلنے والے حجاج کے ساتھ میڈیکل گاڑیاں چلائی جارہی ہیں ۔ منی اور جمرات کے مقام پر الگ سے 16 ہنگامی طبی مراکز اور 190 ایمبولینس فراہم کی گئی ہیں ۔
اور ان طبی خدمات کو انجام دینے کے لئے 32 ہزار ڈاکٹروں اور طبی کارکنوں کو لگایا گیا ہے ۔
یہ تو صرف صحت اور علاج کے میدان میں سعودی حکومت کی خدمات کا ایک نمونہ ہے ۔ اسکے علاوہ وزارت شؤ ن اسلامیہ کی جانب سے ہزاروں علماء اور مترجمین کو حاجیوں کی رہنمائی کے لئے متعین کیا جاتا ہے تاکہ حاجیوں کو ارکان حج کی ادائیگی میں کوی دشواری پیش نہ آئے ۔ اسکے علاوہ ہر قدم پر سعودی پولیس کے عملہ پوری مستعدی اور ایمانداری کے ساتھ اپنی خدمات انجام دیتے نظر آتے ہیں ۔
بلا شبہ حاجیوں کی خدمت کے لئے سعودی حکومت کی یہ کوششیں اور بے مثال خدمات اس بات کا ثبوت ہیں کہ خادم الحرمین الشریفین شاہ سلمان بن عبدالعزیز اور انکے ولی عہد شہزادہ محمد بن سلمان کی نگرانی میں سعودی حکومت حجاج کرام کے لئے جو بے مثال خدمات انجام دے رہی ہے اس سے زیادہ کا تصور مشکل ہےاللہ تعالیٰ اس حکومت کی حفاظت فرمائے آمین
از ڈاکٹر ارشد فہیم مدنی
