نوح،میوات،11 جولائی،سماج نیوز سروس: تنخواہوں میں اضافے سمیت مختلف مطالبات کو لیکر نوح۔پلول شاہراہ واقع ضلع سکریٹریٹ کے سامنے کلرکوں کی ہڑتال منگل کو بھی جاری رہی۔ بارش کے درمیان بھی کلرک ہڑتال پر رہے۔ ہڑتال کے باعث سرکاری محکموں میں کام ٹھپ ہو کر رہ گیا جس سے عام آدمی کو پریشانی کا سامنا کرنا پڑرہا ہے۔ غورطلب ہے کہ گذشتہ 5 جولائی سے صوبہ کے دیگر اضلاع کے ساتھ ہی ضلع نوح کے مختلف دفاتر میں تعینات کلرک 35400 گریڈ پے دینے سمیت دیگر مطالبات کو لیکر ہڑتال پر بیٹھے ہیں جس سے عام جن کو بیحد پریشانیوں کا سامنا کرنا پڑرہا ہے ۔ کلیریکل ویلفیئر سوسائٹی کے ضلع صدر بلجیت سنگھ ، جنرل سکریٹری دیپک ، ایڈوائز اجے چٹانی ، جونل کوآرڈینٹر اختر حسین ، ضلع کوآرڈینٹر راکیش گولا و خازن ہتیش کمار نے مشترکہ طور پر پریس کو جاری بیان میں بتایا کہ کلرکوں کی ہڑتال کو دیگر تنظیموں کی بھی حمایت مل رہی ہے جس سے ہمیں اور زیادہ مضبوطی مل رہی ہے ۔انہوںنے کہا کہ جب تک ہمارے مطالبات پورے نہیں ہوں گے ہماری ہڑتال جاری رہے گی ۔
وہیں ہریانہ اسٹیٹ ایمپلائز یونین کے صوبائی صدر بی ایم ایس کرشنا لال گجر و ریاستی تنظیم سکریٹری ہنومان گودارا نے کہا کہ بیحد خوشی کی بات ہے کہ ہمیں مسلسل صوبہ کی دیگر تنظیموں کی جانب سے حمایت مل رہی ہے۔ انہوںنے کہا کہ ہریانہ پی ڈبلیو ڈی ایمپلائیز ایسوسی ایشن ، کنٹریکٹڈ الیکٹریکل ایمپلائز ایسوسی ایشن ،این ایچ ایم ہیلتھ ڈپارٹمنٹ ، ہریانہ کمپیوٹر پروفیشنل ایمپلائز ایسوسی ایشن ، پیکس ایمپلائز ریجنل فیڈریشن ، ہریانہ اسٹیٹ ایمپلائز یونین سے متعلق تنظیموں بشمول بینک یونین ، دیہی صفائی ملازمین یونین نے کلریکل ملازمین کی تحریک میں بڑھ چڑھ کر حصہ لینے کا فیصلہ کیا ہے ۔ ملازم رہنماؤں نے کہا کہ کلرکوں کو 35400گریڈ پے دینے کا مطالبہ بر وقت پورا کیا جائے بصورت دیگر اس گونگی بہری مخلوط حکومت کو منہ توڑ جواب دیا جائے گا ۔انہوںنے کہا کہ ایسا لگتا ہے کہ حکومت بی جے پی کے بجائے بیورو کریٹس چلارہے ہیں۔ انہوںنے متنبہ کیا کہ ہڑتالی کلرکوں کے ساتھ بات چیت کرنے اور ریاست میں عمومی ماحول پر سکون کرنے کا ابھی بھی وقت ہے۔
