نئی دہلی،12؍جولائی، ہماراسماج: حج 2023کی ادائیگی کے بعدحجاج کرام کی وطن واپسی کا سلسلہ جاری ہے۔ اس درمیان دہلی ایمبارکیشن پوائنٹ سے ادائیگی حج کے لیے جانے والے حجاج کرام سعودی ایئر لائنس کی پروازوں سے مسلسل وطن عزیز کو واپس آ رہے ہیں۔ دہلی اسٹیٹ حج کمیٹی کے ایگزیکٹو آفیسر جناب اشفاق احمدعارفی کی جانب سے فراہم اطلاع کے مطابق اب تک 37پروازوں سے 13073حجاج کی واپسی مکمل ہو چکی ہیں جبکہ سعودی ایئر لائنس کی فلائٹ نمبر SV-3770سے101بغیر محرم خواتین کی واپسی پر دہلی اسٹیٹ حج کمیٹی کی چیئر پرسن محترمہ کوثر جہاں نے اندرا گاندھی انٹرنیشنل ایئرپورٹ پر ان خواتین حجاج کا پرجوش خیر مقدم کیا۔اس موقع پر حج کمیٹی ممبران محترمہ نازیہ دانش، جناب محمد سعد،ایگزیکٹو آفیسر جناب اشفاق احمد عارفی، ڈپٹی ایگزیکٹو آفیسر جناب محسن علی اور حج کمیٹی کے دیگر اسٹاف بھی موجود تھے۔
چیئر پرسن کوثر جہاں نے دہلی واپس لوٹنے والی بغیر محرم خواتین حجاج کرام سے ذاتی طور پر ملاقات کرتے ہوئے پھول اور مالائوں سے ان کاخصوصی استقبال کیا ۔ خواتین حجاج نے اپنی پرامن وطن واپسی پر خوشی ظاہر کرتے ہوئے اطمینان و سکون کا اظہار کیا اوراپنے تجربات واحساسات چیئر پرسن کوثر جہاں سے بیان کیے۔
واضح ہو کہ دہلی اسٹیٹ حج کمیٹی کے زیر انتظام ریاست دہلی سے حج بیت اللہ کے لیے جانے والے 2699حجاج کے علاوہ دیگر ریاستوں کے کل 19400حجاج کی وطن واپسی کا سلسلہ گذشتہ 03؍جولائی 2023سے مسلسل جاری ہے اور یہ سلسلہ آئندہ21؍جولائی کو مکمل ہوگا۔اب تک وطن واپس آنے والے کل 13073حجاج میں مرد حجاج کی تعداد6931 اور خواتین حجاج کی تعداد6142ہے۔ ان میں بغیر محرم خواتین حجاج کی تعداد101 ہے جس میں ریاست دہلی سے 37، اتر پردیش سے39،اترا کھنڈسے11،بہارسے06، ہریانہ سے03،جموں کشمیرسے04اورمدھیہ پردیش کی01 خواتین شامل ہیں۔
دوسری جانب حج کمیٹی کے ممبر جناب محمد سعدکی سعودی ڈیلیگیشن کے طور پر سعادت حج بیت سے گذشتہ دنوں وطن واپسی پر دہلی اسٹیٹ حج کمیٹی میں انہیں ایک پرتپاک استقبالیہ پیش کیا گیا جس میں حج کمیٹی کی چیئرپرسن محترمہ کوثر جہاں اور دیگر افسران و اسٹاف ممبران نے انہیں گلدستہ پیش کرکے مبارکباد پیش کی۔
