مکان گرِنے سے خاتون کی موت، انڈر پاس میں ڈوب نابالغ ہلاک

(رضوان سلمانی)
دیوبند، 12؍ سماج نیوز سروس: گزشتہ کئی روز سے مسلسل ہورہی بارش کے دوران آج بدھ کے روزمحلہ سرائے پیرزادگان میں غریب مزدور نثار کا مکان گرِ گیا۔ غنیمت رہی کہ بارش کے وقت گھر میں کوئی موجود نہیں تھا،ورنہ بڑا حادثہ پیش آسکتاتھا۔ محلہ سرائے پیرزادگان میں واقع ٹیچر کالونی روڈ پر نثار احمد کا مکان ہے، ایک دن کی دھوپ کے بعدآج بدھ کے روز ہوئی بارش میں یہ مکان بھر بھراکر گرِ گیا،حالانکہ غنیمت رہا کہ اس دوران مکان میں کوئی نہیں تھا،ورنہ بڑا حادثہ پیش آسکتا تھا،لیکن گھر کا تمام سامان میں ملبہ میں دب کر خاک ہوگیا۔متاثرہ نثار احمد کی اہلیہ نور جہاں نے بتایا کہ وہ گزشتہ پانچ سال سے نگر پالیکا دفتر میں وزیر اعظم رہائشی اسکیم کے تحت مکان کی تعمیر کے لیے فارم بھر رہے ہیں لیکن ان کا فارم پاس نہیں ہو رہا۔ انہوں نے کہا کہ کئی دنوں سے ہو رہی بارش کی وجہ سے ہم کئی بار گھروں میں گھسے پانی کو نکالنے پر مجبور ہیں۔ نورجہاں نے بتایا کہ بدھ کی دوپہر اچانک کمرے کی چھت گرِ گئی جس میں روزمرہ کی ضروریات کا سامان دب کر تباہ ہو گیا۔ متاثرہ نے انتظامیہ سے درخواست کی کہ پردھان منتری آواس یوجنا کے تحت اس کے گھر کی تعمیر کروائی جائے۔ ایس ڈی ایم سنجیو کمار نے بتایا کہ یہ معاملہ ابھی تک ان کے علم میں نہیں ہے۔ نوٹس لے کر ضروری کارروائی کی جائے گی۔دوسری جانب مسلسل بارش کے باعث تھانہ ناگل علاقہ کے کوٹہ گاؤں میں کچا مکان اچانک گرِ گیا جس کے ملبے تلے دب کر ایک خاتون کی موت ہو گئی۔ پولیس نے لاش کو پوسٹ مارٹم کے لیے بھیج دیا ہے۔ پٹورای نے جائے وقوعہ کا معائنہ کرکے معاوضہ دلانے کی یقین دہانی کرائی ہے۔اطلاع کے مطابق گاؤں کوٹہ کی رہنے والی 55؍ سالہ سرَلا کی زوجہ رام کمار اپنے گھر سے سامنے کچے مکان سے اُپلے لینے گئی تھی، لیکن اسی دوران مکان زمین دوز ہوگیا،جس کے ملبے تلے دب کر سرلا کی موت ہو گئی۔شور سن کر موقع پر پہنچے لوگوں نے سرلا کو ملبے سے نکالا اور ناگل کے سرکاری اسپتال لے گئے، جہاں ڈاکٹروں نے اسے مردہ قرار دیا۔گاؤں تاج پور کے انتہائی غریب مزدور انتظار کا خاندان اس وقت بڑے حادثے سے بال بال بچ گیا جب صبح سات بجے اس کے کچے کے مکان کی چھت گرِ گئی، حادثے میں کوئی جانی نقصان نہیں ہوا۔ بتایاگیا ہے یہ خاندان بہت غریب ہے۔ خاندان میں پانچ بیٹیاں اور ایک بیٹا ہے۔ وہیں سہارنپور کے متصل واقع شیخ پورہ قدیم میں ریلوے انڈر پاس میں بارش کے پانی میں ڈوب کر ایک نابالغ بچہ کی موت ہو گئی۔ نابالغ نے نہانے کے لیے انڈر پاس میں بھرے پانی میں چھلانگ لگا ئی تھی۔ پانی زیادہ ہونے کی وجہ سے وہ اس میں ڈوب گیا۔ اس نے تقریباً 10 منٹ تک ہاتھ پاؤں مارے اور شور مچایا۔ جس کے بعد گاؤں والوں نے نابالغ کو پانی سے باہر نکالا۔ لیکن تب تک نابالغ کی موت ہو چکی تھی۔ شیخ پورہ قدیم گاؤں کا رہنے والا منیر (16) انڈر پاس میں بھرے پانی میں نہانے کے لیے گیا تھا۔ پانی زیادہ ہونے کی وجہ سے نابالغ پانی میں ڈوب گیا۔ اس کے ساتھ گاؤں کے بچے بھی نہا رہے تھے۔ لیکن منیر نے زیادہ گہرائی میں چلا۔ جس کی وجہ سے وہ ڈوبنے لگا اور ہاتھ مارنے لگا۔ دوسرے بچوں نے بچانے کی کوشش کی لیکن وہ کامیاب نہیں ہوئے۔وہیں سہارنپور کی پاؤں دھوئی ندی میں خان عالمپورہ کا باشندہ نوجوان شاداب موبائل ریل بنانے کے چکر میں پانی کے تیز بہاؤ میں بہہ گیا، جس کی تلاش کی جارہی۔ اُدھر بڑگائوں علاقہ میں گزشتہ کئی روز سے برابر ہورہی زبردست بارش کی وجہ سے علاقہ کے گائوں کشن پورہ میں کچے مکان کی چھت گرگئی ، غنیمت یہ رہی کہ اس وقت اہل خانہ کے افراد گھر کے آنگن میں چھپر میں بیٹھے ہوئے تھے، نہیں تو بڑا حادثہ رونما ہوسکتا تھا۔ ہنڈن ندی میں طغیانی آنے کی وجہ سے ندی کے کنارے بسے شملانہ گائوں میں کئی مکانات میں پانی بھر گیا ہے جس کی وجہ سے ان کا سامان خراب ہوگیا ہے ۔ گائوں کے باشندے اپنے گھرو ں سے نقل مکانی کرکے محفوظ جگہ پر جارہے ہیں۔ اس سلسلہ میں گائوں پردھان کاکا رانا کا کہنا ہے کہ گھروں میں ندی کا پانی بھرجانے کی وجہ سے لوگوں کا گھریلو سامان خراب ہوگیا ہے اور وہ دوسری جگہ منتقل ہورہے ہیں ۔ انہوں نے بتایا کہ گائوں کی ندی علاقہ میں ہزاروں بیگہہ گنے کی فصل برباد ہوچکی ہے ۔