نئی دہلی 12اکتوبر، سماج نیوز سروس: یونانی دواساز کمپنیوں کی تنظیم یونانی ڈرگس مینوفیکچررس ایسوسی ایشن (UDMA) کی اْڈما فاؤنڈ یشن ڈے کے موقع پر ایک اہم میٹنگ زیر صدارت حکیم محسن دہلوی (جنرل سکریٹری) جامعہ ہمدرد میں منعقد ہوئی۔ اڈما کے پیٹرون محمّد عارف نے کہا کہ ہندوستان کی فضا طب یونانی کے لئے موافق اور سازگار ہے۔ قیامِ اْڈما کے اہم مقاصد میں یہ بھی شامل ہے کہ یہ نظامِ علاج قومی صحت کے ہر میدان میں اپنا کردار بحسن و خوبی انجام دیں۔ محمّد جلیس جوائنٹ سکریٹری)نے کہا کہ یونانی دواساز اداروں کی تنظیم اْڈما کے پیش نظر کئی نیک مقاصد ہیں، ان کی حصولیابی کے لئے ہم پْرعظم ہیں۔پرویز احمد خاں خزانچی نے کہا اْڈما کے بینر تلے ہم یونانی طریقہ علاج کو محکمہ آیوش کے تعاون سے ملک بھر میں نافذ کرنا چاہتے ہیں۔سیّد منیر عظمت (فاؤنڈر ممبر) نے کہا اعلٰی ترین معیار کی ادویہ کی بہ آسانی فراہمی اْڈما کے نصب العین میں شامل ہے، اس کے لئے ہم کمربستہ ہیں۔حکیم عزیر بقائی نے کہا کہ تنظیم اْڈما کے قیام کا مقصد طب یونانی کے حوالے سے پوری دنیا میں ممتاز مقام حاصل کرنا ہے۔ ڈاکٹر کاشف ذکائی و ڈاکٹر محمّد خبیب بقائی نے کہا کہ شانہ بہ شانہ اور قدم بہ قدم کاروانِ طب کا سفر جاری و ساری ہے۔ طِب یونانی کو موجودہ تقاضوں سے ہم آہنگ کر کے بامِ عروج تک پہونچانا ہمارا خاص مقصد ہے۔ صبور احمد صدیقی اور ڈاکٹر کے۔ ٹی اجمل کے نمائندہ خاص ٹی۔ ٹی۔ انور نے کہا کہ باہمی اتّفاق و اتّحاد کے ساتھ اراکین اْڈما سرگرمِ عَمل ہیں۔ حکیم اعجاز احمد اعجازی اڈما میڈیا انچارج نے کہا کہ اراکینِ اْڈما سارے عالم میں ہربل انقلاب برپا کرنے پر آمادہ ہیں۔ تین روزہ جشن اْڈما” کے علمی و فنّی اور تحریکی پروگرامس سے ملک و بیرون ملک کے گوشے گوشے تک ہربل انقلاب کے تعلق سے عمدہ پیغام جائیگا ۔ اس موقع پر مذکورہ سنٹر آف اکسیلنس کے ذمّہ دار پروفیسر محمّد سعید بھی موجود تھے۔صدر مجلس حکیم محسن دہلوی نے کہا کہ تیز رفتار بدلتی ہوئی دنیا، انگڑائی لیتا ہوا وقت اور کروٹیں بدلتے ہوئیحالات میں ہم سب باہمی اتفاق و اتحاد، یقیں محکم اور بلند عزائم کے ساتھ عصر حاضر کی ٹیکنالوجی کی سہولیات سے فائدہ اٹھاتے ہوئے یونانی طِب کی دنیا میں کارہائے نمایاں انجام دے سکتے ہیں۔انھوں ننے مزید کہا ممبئی میں منعقد ہونے والا تین روزہ جشنِ اڈما۔ 2023 کے افتتاحی تقریب، کانفرنس اور آیوش ہیلتھ میلہ پر مشتمل پروگرامس میں محکمہ آیوش کے اعلٰی حکّام، معزز شخصیّات، طبّی جہاں کے ماہرین، پروفیسرس، اسکالرس مع طلباء و طالبات نیز یونانی ہاسپیٹل کے اطباء ، فزیسینز کے علاوہ اہلیان علم و دانش اور کثیر تعداد میں عوام الناس کی شرکت رہیگی۔
