نئی دہلی20نومبر، سماج نیوز سروس:آل انڈیا یونانی طبی کانفرنس کی ایشور نگر نیو فرینڈس کالونی میں دہلی اسٹیٹ یونٹ کی ایک میٹنگ منعقد کی گئی جس کی صدارت سینٹرل کور کمیٹی کے صدر حکیم امام الدین ذکائی نے کی ۔ خاص طور پر سکریٹری جنرل ڈاکٹر خالد صدیقی کی زیر نگرانی میں اسٹیٹ یونٹ کو کیسے فعال اور کامیاب بنایا جائے ۔ اس سلسلے میں تبادلہ خیال کیا گیا۔ یونانی اور آیورویدک طبیہ کالج قرول باغ کے پرنسپل ڈاکٹر زبیر احمد جبکہ سینٹرل کور کمیٹی کے ممبران میں ڈاکٹر محمد اکرم ، ڈاکٹر شبیر احمد، ڈاکٹر عشرت کفیل کے علاوہ دہلی یونٹ کے صدر ڈاکٹر محمد نفیس صدیقی اور نائب صدر ڈاکٹر محمد کاشف ذکائی ، سکریٹری ڈاکٹر محمد شعیب علی ، جوائنٹ سکریٹری ڈاکٹر محمد عاقف ۔ جبکہ ممبران میں ڈاکٹر محمد نعمان ، ڈاکٹر صبوحی یاسین ، ڈاکٹر محمد ضمیر وغیرہ نے شرکت کی ۔ میٹنگ میں یونانی کے موجودہ حال پر تبادلہ خیال کیا گیا ۔ اور نئے قدم اٹھانے پر بھی زور دیا گیا ۔ اس دوران یونانی طبی کانفرنس کی سرگرمیوں میں اضافہ کرنے پر زور دیا تو وہیں زیادہ سے زیادہ ورکشاپ اور سیمینار کا انعقاد کرانے پر بھی تبادلہ خیال کیا گیا۔ اس کے ساتھ ہی میٹنگ میں یونانی طریقہ تشخیص اور علاج کو یونانی گریجویٹ تک کیسے پہنچایا جائے اس منصوبے پر بھی بات چیت کی گئی ۔ مختلف ڈاکٹرس نے ہیلتھ کیمپ لگانے پر بھی زور دیا۔ اور کہا کہ اس کیمپ کے ذریعے عوام کو یونانی سے فیضیاب کیا جائے ۔ اس کے ساتھ ہی اس بات پر بھی عام رائے بنی کہ طبی کانفرنس مختلف کالجوں میں مقابلہ جاتی پروگرام کرائیں ۔ اس کے ساتھ ہی یونانی کالجوں میں نمایاں کامیابی حاصل کرنے والے طلبہ کو ایوارڈ سے نوازا جائے ۔ ان طلبہ کے لئے مقابلہ جاتی پروگرام کے ساتھ ساتھ سرٹیفکیٹ وغیرہ میں بھی ان کو کامیاب بنایا جائے۔ طبی کانفرنس نے طے کیا ہے کہ یونانی سے وابستہ سینٹرل ڈاٹا جمع کیا جائے گا جس میں آل انڈیا سطح پر جوبھی اسامیاں نکلتی ہیں ان کو بھرنے کے لئے تمام تیاریاں کرائی جائیں گی۔ اتنا ہی نہیں بلکہ یونانی سے وابستہ جو بھی مسائل ہوں گے ان کو تحریری اور عملی طور پر حل کیا جائے گا۔
