نئی دہلی: 27 دسمبر /سماج نیوز سروس ۔مرکزی وزیر داخلہ امت شاہ نے آج کہا کہ ‘مسلم لیگ جموں کشمیر نامی تنظیم کو انسداد دہشت گردی قانون کے تحت ‘غیر قانونی ایسوسی ایشن قرار دیا گیا ہے۔اس تنظیم کی قیادت آل انڈیا حریت کانفرنس کے 
سخت گیر دھڑے کے عبوری چیئرمین مسرت عالم کر رہے ہیں، جس کی قیادت پہلے علیحدگی پسند رہنما سید علی شاہ گیلانی کر رہے تھے۔مسٹر شاہ نے X پر ایک پوسٹ میں کہا، "یہ تنظیم اور اس کے ارکان جموں و کشمیر میں ملک دشمن اور علیحدگی پسند سرگرمیوں میں ملوث ہیں جو دہشت گردانہ سرگرمیوں کی حمایت کرتے ہیں اور لوگوں کو جموں و کشمیر میں اسلامی حکمرانی قائم کرنے کے لیے اکساتے ہیں۔”انہوں نے مزید کہا کہ ہندوستان کے اتحاد، خودمختاری اور سالمیت کے خلاف کام کرنے والوں کو بخشا نہیں جائے گا۔ وزیر داخلہ نے کہا، "وزیراعظم اور حکومت کا پیغام بلند اور واضح ہے کہ ہمارے ملک کے اتحاد، خودمختاری اور سالمیت کے خلاف کام کرنے والوں کو بخشا نہیں جائے گا اور اسے قانون کے مکمل غضب کا سامنا کرنا پڑے گا۔”وزارت داخلہ کے نوٹیفکیشن میں کہا گیا ہے کہ یہ تنظیم "بھارت مخالف اور پاکستان نواز پروپیگنڈے” کے لیے مشہور ہے۔ انہوں نے مزید کہا کہ اس کے رہنما غیر قانونی سرگرمیوں کو انجام دینے کے لیے "پاکستان اور اس کی پراکسی تنظیموں سمیت” مختلف ذرائع سے فنڈز اکٹھا کرنے میں ملوث رہے ہیں۔ اس میں مزید کہا گیا ہے کہ تنظیم کے ارکان علیحدگی پسند سرگرمیوں میں ملوث رہے ہیں اور ملک کی آئینی اتھارٹی کے خلاف ہمیشہ مصروف رہتے ہیں۔
نوٹیفکیشن میں کہا گیا ہے کہ تنظیم کے رہنما، خاص طور پر اس کے چیئرمین مسرت عالم، ملک کے اتحاد، سالمیت، سلامتی اور فرقہ وارانہ ہم آہنگی کو نقصان پہنچانے والی غیر قانونی سرگرمیوں میں ملوث رہے ہیں۔
