پٹنہ، 28 دسمبر (یو این آئی) جنتا دل یونائیٹڈ (جے ڈی یو) کے قومی صدر راجیو رنجن سنگھ عرف للن سنگھ نے اپنے استعفیٰ اور جے ڈی یو صدر عہدے سے ہٹائے جانے کے امکانات کو لیکر چل رہی قیاس آرائیوں کے درمیان آج کہاکہ وہ بالکل ناراض نہیں ہیں۔ مسٹر سنگھ نے جمعرات کو نامہ نگاروں سے کہا کہ وہ کسی بھی وجہ سے پارٹی سے ناراض نہیں ہیں۔ انہوں نے کہا کہ جے ڈی یو میں سبھی متحد ہیں اور مستقبل میں بھی متحد رہیں گے ۔ جے ڈی یو صدر نے کہاکہ بہار کے وزیر اعلی نتیش کمار پارٹی کے سپریم لیڈر ہیں۔ انہوں نے 29 دسمبر کو نئی دہلی میں جے ڈی یو کی قومی ایگزیکٹو میٹنگ کے دوران پارٹی صدر کے عہدے سے استعفیٰ دینے کے امکان کے بارے میں پوچھے گئے ایک سوال کا جواب دینے سے انکار کردیا۔ انہوں نے واضح طور پر اس حوالے سے میڈیا والوں کے سوالات سے بچنے کی کوشش کی اور کہا کہ ایسا کرنے سے پہلے وہ ان سے مشورہ کریں گے ۔ قابل ذکر ہے کہ مسٹر سنگھ جے ڈی یو کی قومی ایگزیکٹو میٹنگ میں شرکت کے لیے جمعہ کو نئی دہلی پہنچیں گے ۔ قومی کونسل کا اجلاس بھی اسی دن ہوگا۔ اس دن پارٹی کے سرکردہ لیڈر بشمول چیف منسٹر مسٹرکمار 2024 کے لوک سبھا انتخابات کی حکمت عملی پر تبادلہ خیال کریں گے ۔
کچھ دن پہلے جے ڈی یو صدر کے عہدے سے مسٹرللن سنگھ کے استعفیٰ کی افواہ سے سیاسی حلقوں میں ہلچل مچی ہوئی ہے ۔ تاہم جے ڈی یو کے سینئر لیڈر اور بہار کے وزیر خزانہ وجے کمار چودھری نے مسٹر سنگھ کے استعفیٰ سے متعلق میڈیا رپورٹس کو مسترد کر دیا تھا اور کہا تھا کہ یہ محض قیاس آرائیاں ہیں جن کی کوئی بنیاد اور کوئی سچائی نہیں ہے ۔ بعد میں مسٹر سنگھ نے بھی پارٹی صدر کے عہدے سے استعفیٰ دینے کی نفی کی تھی۔
