نئی دہلی،پریس ریلیز،ہمارا سماج:آل انڈیا یونانی طبی کانگریس فارمیسی ونگ ، نئی دہلی کی ایک میٹنگ 12 فروری ’عالمی یونانی میڈیسن ڈے‘ 2024 کی تیاریوں کا جائزہ لینے کے لیے بقائی دواخانہ، دریاگنج، نئی دہلی میں زیر صدارت حکیم ارباب الدین منعقد ہوئی۔ میٹنگ کا آغاز حکیم حافظ محمد مرتضیٰ دہلوی کی تلاوت قرآن پاک سے ہوا۔ میٹنگ کے اہم شرکاء میں ڈاکٹر سیّد احمد خاں (سکریٹری جنرل، آل انڈیا یونانی طبّی کانگریس) کے علاوہ ڈاکٹر حبیب اللہ، ڈاکٹر شکیل احمد، ڈاکٹر مرزا آصف بیگ، ڈاکٹر جمال، حکیم عزیزالرحمن بقائی، حکیم عطاء الرحمن اجملی، حکیم آفتاب عالم، حکیم نعیم رضا، محمد جلیس (لمرا)، محمد صادق اور محمد عمران قنوجی کے نام قابل ذکر ہیں۔ میٹنگ میں ’عالمی یونانی میڈیسن ڈے‘ سیلیبریشن کمیٹی کے کنوینر کے طور پر ڈاکٹر مرزا آصف بیگ اور کو کنوینر کے طور پر ڈاکٹر عزیر بقائی اور حکیم نعیم رضا کو نامزد کیا گیا۔ میٹنگ میں یونانی دواسازی کے مسائل اور حل پر بھی سیرحاصل گفتگو ہوئی۔ خاص طور سے جڑی بوٹیوں کی دستیابی اور ان کی قیمت پر قابو پائے جانے پر زور دیا گیا اور مرکزی حکومت کے محکمہ آیوش سے مطالبہ کیا گیا کہ آیوش کی مرکب دوائوں میں استعمال ہونے والی اینیمل سورس کی دوائوں کی فراہمی یقینی بنائی جائے۔ میٹنگ میں کہا گیا کہ عام طور سے بڑے پیمانے پر جنگلی جانور حادثہ کا شکار ہوجاتے ہیں اور ان کے باقیات خراب ہوکر کسی مقصد کے نہیں رہ جاتے اگر محکمہ جنگلات سے محکمہ آیوش معاہدے کے تحت حادثاتی جانوروں کے باقیات کو محفوظ کرنے اور فروخت کرنے کے لیے استعمال ہو تو وہ سرکار کے لیے ریونیو کا بھی ایک بڑا ذریعہ بنے گا اور اس کا فائدہ عوام الناس کو بھی ہوگا۔
