شملہ، (یو این آئی) ہماچل پردیش لوک سبھا انتخابات کے لیے کانگریس کی طرف سے مقرر کردہ میڈیا کوآرڈینیٹر امرت گل نے کہا ہے کہ میڈیا کے طاقتور کردار کے پیش نظر، بھارتیہ جنتا پارٹی کے کسی بھی جھوٹے پروپیگنڈے کو میڈیا میں مؤثر طریقے سے اٹھایا جانا چاہیے ۔مسٹر گل نے کہا کہ موجودہ وقت میں پرنٹ، الیکٹرانک اور سوشل میڈیا سبھی لوگوں کو آسانی سے دستیاب ہیں، اس لیے لوگوں کو ان تینوں میڈیم پر پارٹی کی پالیسیوں اور پروگراموں کے بارے میں مکمل معلومات فراہم کی جانی چاہیے ۔ انہوں نے تمام ترجمانوں سے کہا کہ وہ آپس میں مکمل تال میل برقرار رکھیں اور بی جے پی کے کسی بھی جھوٹے پروپیگنڈے کا سختی سے جواب دیں۔ جمعہ کو ریاستی کانگریس ہیڈکوارٹر راجیو بھون میں ترجمانوں اور میڈیا پینلسٹس کی میٹنگ کی صدارت کرتے ہوئے مسٹر گِل نے کہا کہ ہر کسی کو حقائق کی مکمل تیاری اور جانکاری کے ساتھ میڈیا کے سامنے جانا چاہئے ۔ انہوں نے کہا کہ کسی بھی موضوع کو آل انڈیا کانگریس کمیٹی کے رہنما خطوط کے تحت ہی میڈیا کے سامنے پیش کیا جائے ۔ انہوں نے کہا کہ لوک سبھا انتخابات میں پارٹی کی پالیسیوں اور پروگراموں کا خصوصی ذکر کیا جانا چاہئے ۔انہوں نے میٹنگ میں موجود ترجمانوں سے کہا کہ ریاستی بی جے پی کے دوہرے کردار کو اجاگر کرتے ہوئے لوگوں کو بی جے پی کے اقدامات سے بھی آگاہ کرانا ہوگا۔ انہوں نے کہا کہ ریاست کی کانگریس حکومت نے آفات سے متاثرہ لوگوں کو جو مدد فراہم کی ہے وہ قابل ستائش ہے ۔
