جمعیۃ یوتھ کلب کا ایک اور سنگ میل

صدر جمعیۃ علماء ہند، دارالعلوم دیوبند کے مہتمم و دیگر اہم شخصیات کا اظہار مسرت

نئی دہلی ء :پریس ریلیز ہمارا سماج جمعیۃ یوتھ کلب نے مختصر سی مدت میں کئی اہم سنگ میل حاصل کیے ہیں۔ اسی سلسلے کو آگے بڑھاتے ہوئے جمعیۃ یوتھ کلب بنارس کی ٹیم، بنارس میں 75ویں یوم جمہوریہ تقریب پر پولس لائن کی پریڈ میں محکمہ پولس کی مختلف ٹکڑیوں کے ساتھ شامل ہوئی اور شاندار کارکردگی کا مظاہرہ کرنے پر پرشستی پتر حاصل کیا۔ جمعیۃ یوتھ کلب بنارس کے سیکریٹری محمد رضوان نے بتایا کہ دیگر ٹکڑیوں کی طرح ہماری 25 رکنی ٹیم لیڈر خالد سعید کی قیادت میں شامل ہوئی، ساتھ ہی ساتھ 5 رکنی ٹیم نے مولانا نورالبشر کی قیادت میں ڈیزاسٹر مینجمنٹ کا پروگرام پیش کیا۔ پروگرام کے مہمان خصوصی اترپردیش سرکار کے کابینی وزیر جناب انل راجبھر تھے جب کہ جمعیۃ یوتھ کلب کے ناظم مولانا قاری احمد عبداللہ بھی پروگرام میں شریک ہوئے ۔ اس موقع پر جمعیۃ علماء ہند کے صدرمولانا سید محمود اسعد مدنی نے اپنے پیغام میں کہا کہ ہمیں جمعیۃ یوتھ کلب کے سکریٹری قاری احمد عبداللہ کے ذریعہ یہ معلوم ہوا کہ26 جنوری کے پریڈ میں سول لائن اور پولس پریڈ کے ساتھ ہمارے جوان شامل ہوئے۔ جمعیۃ یوتھ کلب کے ذمہ داروں حافظ عبیداللہ، رضوان اور بنارس کے تمام ذمہ داروں کو خصوصی مبارکباد پیش کرتا ہوں۔ انھوں نے بتایا کہ یقیناً یہ ہم سب کے لیے بہت ہی خوشی کا موقع ہے اور دیگر اضلاع میں جمعیۃ یوتھ کلب کے نوجوان اس سے حوصلہ پائیں گے اور آگے بڑھیں گے۔اپنے آڈیو پیغام میں دارالعلوم دیوبند کے شیخ الحدیث و مہتمم مولانا مفتی ابوالقاسم نعمانی نے بھی انتہائی مسرت کا اظہار کیا ہے اور امید ظاہر کی ہے کہ اس سے نوجوانوں کی عزم و ہمت میں بھی اضافہ ہوگا۔جمعیۃ علماء ہند کے ناظم عمومی مولانا حکیم الدین قاسمی نے اپنے پیغام میں کہا کہ میںدل کی گہرائیوں سے اس پوری ٹیم کو مبارکباد پیش کرتا ہو ں،میں اس موقع پر خوشی کے آنسو کو نہیں روک پارہاہوں۔جمعیۃ یوتھ کلب کے کمشنر مولانا کلیم اللہ قاسمی نے اپنے پیغام میں جمعیۃ یوتھ کلب کے سبھی ذمہ داروں کو مبارک باد دی۔