نئی دہلی، پریس ریلیز،ہمارا سماج:کالج کے شعبہ اردو کے زیر اہتمام ہر سال محفل قوالی، بیت بازی، غزل سرائی، محفل غزل، چہار بیت اور شعری نشستوں جیسے پروگراموں کا اہتمام کیا جاتا ہے۔ اسی سلسلہ کو جاری رکھتے ہوئےاس سال بھی ذاکر حسین دہلی کالج (شبینہ) میں ایک بہترین اور پر وقار محفل غزل کا انعقاد کیا گیا، جو بزمِ ادب سوسائیٹی کے زیر اہتمام اور پرنسپل پروفیسر ڈاکٹر مسرور احمد بیگ کی سرپرستی میں منعقد ہوئ جس میں مشہورغزل گایک جناب شکیل احمد نے سماں باندھ دیا۔طلبا کے ساتھ اساتذہ نے فرمائشوں کاجو سلسلہ شروع کیاوہ تھمنے کا نام نہیں لے رہا تھا۔ ٹھیک 4 بجے شام پروگرام شروع ہوا اور اندھیرا ہونے کے بعد تک جاری رہا۔ پروفیسر پاکیزہ صمد نے مہمان غزل گایک کو گلدستہ پیش کرکے ان کا استقبال کیا۔ اسکے بعد شعبۂ اردو کے سینئر ترین پروفیسر مظہر احمد اور پروفیسر شاہینہ تبسم نے گلپوشی کی رسم ادا کی۔اس کے بعد باضابطہ طور پر محفل کا انعقاد ہوا اور ہال میں موجود ہر فرد جھوم جھوم اٹھا۔ محفل میں دیگر شعبوں کے پروفیسران بھی موجود تھے۔ خاص طور پر شعبۂ اردو کے اساتذہ،پروفیسر مظہر احمد، پروفیسر شاہینہ تبسم، پروفیسر ظہیر رحمتی، پروفیسر نوشاد عالم، ڈاکٹر مظفرالحسن، اور ڈاکٹر عالیہ کے علاوہ درجنوں اساتذہ نے پروگرام میں شرکت کی۔پروگرام کے اختتام کے بعد بزمِ ادب کے کارکنان کو انکی کارکردگی کے لیے سرٹیفکیٹس اور میڈلز سے نوازا گیا۔
