روہنگیا کے حامی سی اے اے کی مخالفت کر رہے ہیں: بی جے پی

نئی دہلی،(یو این آئی) بھارتیہ جنتا پارٹی (بی جے پی) نے بدھ کے روز اپوزیشن پر شہریت سے متعلق ترمیمی قانون (سی اے اے ) کے سلسلے میں مسلمانوں کی خوشنودی کے لیے جھوٹ بول کر ملک میں انتشار پھیلانے کا الزام لگایا اور کہا کہ روہنگیا مسلمانوں کا ساتھ دے کر انہیں بڑے پیمانے پر ہندوستان میں بسانے کی سازش کرنے والے لوگ پڑوسی ممالک میں مذہبی ظلم و ستم کا شکار اقلیتی لوگوں کو شہریت دینے کی مخالفت کر رہے ہیں۔بی جے پی کے سینئر لیڈر سابق مرکزی وزیر ممبر پارلیمنٹ روی شنکر پرساد نے یہاں نامہ نگاروں سے بات کرتے ہوئے یہ بات کہی۔ سی اے اے کے معاملے پر خوشامد کی سیاست میں ملوث ہونے پر دہلی کے وزیر اعلی اروند کیجریوال پر حملہ کرتے ہوئے انہوں نے کہا کہ مسٹر کیجریوال ووٹ بینک کی توقع میں کسی بھی حد تک جا سکتے ہیں۔ مسٹر کیجریوال سمیت اپوزیشن پارٹیوں کے لیڈر روہنگیا کے حق میں کھڑے ہیں اور پڑوسی ممالک سے آئے ہوئے مظلوم لوگوں کو شہریت دینے کی مخالفت کر رہے ہیں۔ انہوں نے کہا کہ سی اے اے قانون کا ہندوستان میں رہنے والے کسی بھی شہری سے کوئی تعلق نہیں ہے ، لیکن سی اے اے کے ذریعے صرف ان لوگوں کو شہریت دی جائے گی جو مذہب کے نام پر تشدد کے بعد ہندوستان آئے ہیں۔مسٹر پرساد نے کہا کہ آج مسٹر کیجریوال کی طرف سے ایک بہت ہی عجیب و غریب بیان آیا ہے کہ سی اے اے کے آنے سے ملک سے باہر کے لوگ نوکری لیں گے ۔ مسٹر کیجریوال کی یہ کیسی دلیل ہے ؟ ہندوستان نے ان ہندوؤں، سکھوں، عیسائیوں اور پارسیوں کو ایک موقع فراہم کیا ہے جو پاکستان، بنگلہ دیش اور افغانستان سے اپنے عقیدے کے نام پر ظلم و ستم کا شکار ہو کر ہندوستان آئے تھے ۔ یہ تمام تشدد زدہ لوگ یہیں ہندوستان میں بڑی تعداد میں رہ رہے ہیں۔ کیا یہ ہندوستان کا اخلاقی، آئینی اور فرض حق نہیں ہے کہ وہ قانونی ذرائع سے ان مظلوم لوگوں کو شہریت کا تحفظ فراہم کرے ؟ انہوں نے کہا "بھارتیہ جنتا پارٹی واضح طور پر کہنا چاہتی ہے کہ سی اے اے قانون کی وجہ سے نہ تو کسی کی نوکری اور نہ ہی کسی کی شہریت چھینی جائے گی۔”مسٹر پرساد نے مسٹر کیجریوال سے سوال کیا کہ وہ ووٹ بینک کی توقع میں کہاں تک جائیں گے ؟ مرکزی وزیر داخلہ امت شاہ نے بارہا واضح کیا ہے کہ سی اے اے ہندوستان کے کسی شہری کی شہریت نہیں چھینے گا اور نہ ہی اس قانون کا ہندوستان کے کسی شہری سے کوئی تعلق ہے ۔ سی اے اے صرف ان لوگوں کو شہریت فراہم کرتا ہے جو مذہب کے نام پر ظلم و ستم کا شکار ہونے کے بعد پاکستان، بنگلہ دیش، افغانستان وغیرہ سے ہندوستان آئے ہیں۔ مسٹر روی شنکر پرساد نے کہا کہ ملک کے محکمہ داخلہ نے ایک بیان جاری کیا ہے جس میں واضح کیا گیا ہے کہ سی اے اے ملک کے مسلمانوں کے خلاف کچھ نہیں کہتا۔ لیکن پھر بھی پروپیگنڈا کیا جا رہا ہے ۔ یہ وہ لوگ ہیں جو روہنگیا کی حمایت میں کھڑے ہیں اور انہیں حقوق اور مواقع دینے کی بات کرتے ہیں۔بی جے پی کے لیڈر نے کہا کہ جہاں وزیر اعظم نریندر مودی اور مرکزی وزیر داخلہ نے پاکستان، بنگلہ دیش اور افغانستان سے مذہب کے نام پر تشدد کا نشانہ بننے اور سی اے اے کو لاگو کرنے کے بعد ہندوستان آنے والے لوگوں کے لیے مناسب فیصلے کیے ، اپوزیشن جماعتوں بشمول عام آدمی پارٹی اور کانگریس احتجاج کر رہی ہے جو انتہائی افسوس ناک ہے ۔مسٹر پرساد نے کہا کہ اپوزیشن سی اے اے پر جھوٹ پھیلا کر عوام کو گمراہ کرنا بند کرے ۔ انہوں نے کہا کہ مغربی بنگال کی وزیر اعلیٰ ممتا بنرجی بھی پریشان ہیں کیونکہ ان کا سیاسی میدان پھسل رہا ہے ۔ مسٹر کیجریوال بھی اسی دوڑ میں شامل ہو گئے ہیں اور جنوبی ہند کے بائیں بازو کے لوگ بھی اس کی مخالفت کر رہے ہیں۔مسٹر پرساد نے کہا کہ بی جے پی یہ واضح کرنا چاہتی ہے کہ شہریت سے متعلق ترمیمی قانون کسی ہندوستانی کی شہریت کو منسوخ نہیں کرتا ہے اور نہ ہی یہ کسی ہندوستانی کو شہریت کے حق سے محروم کرتا ہے ۔ سی اے اے کا مقصد صرف ان لوگوں کو ریلیف فراہم کرنا ہے جنہوں نے اپنے عقیدے کی وجہ سے ظلم و ستم کا سامنا کیا ہے اور جنہیں پاکستان، افغانستان اور بنگلہ دیش سے بھاگنے پر مجبور کیا گیا ہے ۔ ہندوستان سی اے اے کے ذریعے ان پناہ گزینوں کو عزت کے ساتھ پناہ فراہم کرتا ہے ۔