وزیراعظم نے بھارت منڈپم میں اسٹارٹ اپ مہا کمبھ کا افتتاح

نئی دہلی، (یو این آئی) وزیر اعظم نریندر مودی نے آج نئی دہلی کے بھارت منڈپم میں اسٹارٹ اپ مہاکمبھ کا افتتاح کیا۔ وہ اس موقع پر لگائی گئی ایک نمائش بھی دیکھنے گئے ۔اس موقع پر اجتماع سے خطاب کرتے ہوئے وزیر اعظم نے اسٹارٹ اپ مہاکمبھ کی اہمیت کو اجاگر کرتے ہوئے سال 2047 تک ایک وکست بھارت بنانے کی غرض سے کام کرنے کے ملک کے روڈ میپ پر زور دیا۔انہوں نے جدت طرازی اور اسٹارٹ اپ کلچر کے ابھرتے ہوئے رجحانات پر روشنی ڈالی اورگذشتہ چند دہائیوں میں آئی ٹی اور سافٹ ویئر کے شعبے میں ہندوستان کے ذریعہ اپنی چھاپ چھوڑنے کو اجاگر کیا۔اس لئے وزیر اعظم نے کہا کہ اسٹارٹ اپس کی دنیا سے لوگوں کی موجودگی آج کے موقع کی اہمیت کو واضح کرتی ہے ۔ملک میں اسٹارٹ اپس کی کامیابی پر توجہ دیتے ہوئے وزیر اعظم نے اس باصلاحیت عنصر کی طرف توجہ مبذول کرائی جو انہیں کامیاب بناتا ہے ۔انہوں نے سرمایہ کاروں، انکیوبیٹرز، تعلیمی اداروں ،محققین،صنعت کے اراکین، اورموجودہ اور مستقبل کے کاروباری افراداور صنعت کاروں کی موجودگی کا اعتراف کیا اور کہا ‘‘یہ اپنی حقیقی شکل میں واقعی ایک مہاکمبھ ہے جو ایک بے مثال توانائی اورترنگ پیدا کرتا ہے ۔’’ وزیر اعظم نے اسی طرح کے ماحول کا تجربہ کرنے کا ذکر کیا جب وہ کھیلوں اور نمائشی اسٹالز کا دورہ کر رہے تھے جہاں لوگوں نے بڑے فخر کے ساتھ اپنی اختراعات کا مظاہرہ کیا۔وزیر اعظم مودی نے کہا‘‘اسٹارٹ اپ مہاکمبھ کا دورہ کرنے والا کوئی بھی ہندوستانی مستقبل کے یونیکورنز اور ڈیکا کورنز کا مشاہدہ کرے گا’’۔وزیراعظم نے درست پالیسیوں کے باعث ملک میں اسٹارٹ اپ ایکونظام کی ترقی پر اطمینان کا اظہار کیا۔ انہوں نے معاشرے میں اسٹارٹ اپ کے تصور کے بارے میں ابتدائی ہچکچاہٹ اور بے توجہی کا ذکر کیا ۔ انہوں نے کہا کہ اسٹارٹ اپ انڈیا کے تحت کچھ عرصے کے دوران اختراعی خیالات کو ایک پلیٹ فارم ملا۔ انہوں نے مالیاتی ذرائع کے ساتھ خیالات ونظریات کو جوڑکر اور تعلیمی اداروں میں انکیوبیٹرز کے ذریعے ایک ماحولیاتی نظام کے قیام پر تبصرہ کیا جس نے درجہ دوئم اور درجہ سوئم کے شہروں کے نوجوانوں کو سہولیات فراہم کیں۔انہوں نے کہا‘‘اسٹارٹ اپ ایک سماجی ثقافت بن گیا ہے اور کوئی بھی سماجی ثقافت کو نہیں روک سکتا’’۔مسٹر مودی نے کہا کہ اسٹارٹ اپ انقلاب کی قیادت چھوٹے شہر کر رہے ہیں اوران میں بھی زراعت، ٹیکسٹائلز، ادویات، ٹرانسپورٹ، خلاء، یوگا اور آیوروید سمیت وسیع شعبے شامل ہیں۔ خلائسے متعلق اسٹارٹ اپس کے بارے میں وضاحت کرتے ہوئے وزیر اعظم نے کہا کہ ہندوستانی اسٹارٹ اپس خلاء کے شعبے میں 50 سے بھی زیادہ شعبوں میں کام کر رہے ہیں جن میں خلائی شٹل کا آغاز بھی شامل ہے ۔وزیر اعظم نے اسٹارٹ اپس کے بارے میں بدلتی ہوئی ذہنیت پر اپنی رائے کا اظہار کیا ۔ انہوں نے کہا کہ اسٹارٹ اپس نے یہ نفسیات بدل دی ہے کہ کوئی کاروبار شروع کرنے کے لیے بہت زیادہ رقم درکار ہوتی ہے ۔انہوں نے اس بات کے لئے ملک کے نوجوانوں کی ستائش کی کہ وہ ملازمت کے متلاشی بننے کی بجائے روزگار پیدا کرنے والے بننے کا راستہ منتخب کرتے ہیں۔مسٹر مودی نے کہا‘‘ہندوستان میں تیسرا سب سے بڑا اسٹارٹ اپ ایکو نظام موجود ہے جس میں بارہ لاکھ نوجوانوں کے ساتھ 1.25 لاکھ اسٹارٹ اپ ہیں جو ان سے براہ راست جڑے ہوئے ہیں۔’’ وزیر اعظم نے صنعت کاروں سے کہا کہ وہ اپنے پیٹنٹ کو تیزی سے فائل کرنے کے بارے میں چوکس رہیں۔ جی ای ایم پورٹل نے کاروبار ی اداروں اور اسٹارٹ اپس کو 20,000 کروڑ روپے سے زیادہ فراہم کیے ہیں۔انہوں نے نئے شعبوں میں آنے پر نوجوانوں کی تعریف کی۔ وزیر اعظم نے کہا کہ پالیسی پلیٹ فارمز پر شروع کیے گئے اسٹارٹ اپس آج نئی بلندیوں کو چھو رہے ہیں۔