پٹنہ، بہار میں راشٹریہ جنتا دل (آر جے ڈی) کے ٹکٹ پر 13 امیدوار پہلی بار لوک سبھا انتخابات میں اپنی قسمت آزمائیں گے ۔ آر جے ڈی کے ٹکٹ پر اس بار 23 امیدواروں میں سے 13 نئے امیدوار لوک سبھا انتخابات میں اپنی قسمت آزمائیں گے ۔ ان میں چھ موجودہ ایم ایل اے سمیت 13 امیدوار شامل ہیں۔ ان چھ ایم ایل اے میں گیا سیٹ سے بودھ گیا ( محفوظ) کے ایم ایل اے کمار سَروجیت پاسوان، پورنیہ سے روپولی سے ایم ایل اے بیما بھارتی، دربھنگہ سیٹ سے دربھنگہ دیہی سے ایم ایل اے للت یادو، بکسر سیٹ سے آر جے ڈی کے ریاستی صدر جگدانند سنگھ کے بیٹے اور رام گڑھ سے ایم ایل اے سدھاکر سنگھ، سپول سیٹ سے سنگھیشور اسمبلی کے ایم ایل اے چندر ہاس چوپال اور ارریہ سابق مرکزی وزیر تسلیم الدین کے بیٹے اور جوکیہاٹ ایم ایل اے سے شاہنواز عالم شامل ہیں ۔ للت یادو چھ بار اسمبلی انتخابات جیت چکے ہیں۔ انہوں نے سال 1995، 2000 اور اکتوبر 2005 میں منی گاچھی اسمبلی سے اور 2010، 2015 اور 2020 میں دربھنگہ دیہی سے کامیابی حاصل کی۔ بیما بھارتی نے روپولی اسمبلی سے سال 2000، اکتوبر 2005، سال 2010، سال 2015 اور سال 2020 میں پانچ بار الیکشن جیتا تھا۔آر جے ڈی کے دیگر سات امیدوار جو پہلی بار لوک سبھا انتخابات میں حصہ لے رہے ہیں ان میں آر جے ڈی کے قومی صدر لالو پرساد یادو اور سابق وزیر اعلیٰ رابڑی دیوی کی بیٹی روہنی اچاریہ سارن پارلیمانی سیٹ سے ، شراون کشواہا نوادہ سے ، ارچنا روی داس جموئی (محفوظ)، ابھے کمار کشواہا اورنگ آباد سے ، انیتا دیوی مونگیر سے ، ریتو جیسوال شیوہر سے ، کمار چندردیپ مدھے پورہ سے الیکشن لڑیں گے ۔شراون کشواہا اس سے قبل گووند پور اسمبلی حلقہ کے ساتھ ساتھ مقامی بلدیاتی علاقہ سے قانون ساز کونسل کا الیکشن لڑ چکے ہیں۔ ارچنا رویداس مونگیر آر جے ڈی لیڈر مکیش یادو کی بیوی ہیں اور ان کا مائیکا جموئی علاقہ میں ہے ۔ ابھے کمار کشواہا ٹیکری کے سابق ایم ایل اے رہ چکے ہیں اور حال ہی میں جنتا دل یونائیٹڈ (جے ڈی یو) کے گیا ضلع صدر کے عہدے سے استعفی دے کر آر جے ڈی میں شامل ہوئے ہیں۔انیتا دیوی باہوبلی اشوک مہاتو کی بیوی ہیں۔ ریتو جیسوال سابق مکھیہ رہ چکی ہیں۔ سال 2020 کے اسمبلی انتخابات میں ریتو جیسوال نے آر جے ڈی کے ٹکٹ پر پریہار سے قسمت آزمائی لیکن انہیں سابق ایم ایل اے رام نریش یادو کی اہلیہ اور بھارتیہ جنتا پارٹی (بی جے پی) کی امیدوار گایتری دیوی سے محض 1569 ووٹوں کے فرق سے شکست کا سامنا کرنا پڑا۔ ریتو جیسوال آر جے ڈی خواتین سیل کی ریاستی صدر اور سابق آئی اے ایس ارون کمار سنگھ کی اہلیہ ہیں۔ وہیں پیشے کے اعتبار سے پروفیسر کمار چندردیپ، مدھے پورہ لوک سبھا کے سابق رکن پارلیمنٹ اور بھوپیندر نارائن منڈل یونیورسٹی کے بانی وائس چانسلر، سابق رکن پارلیمنٹ ڈاکٹر رویندر کمار یادو روی کے بیٹے اور آئین ساز اسمبلی کے رکن کملیشوری پرساد یادو کے پوتے ہیں۔
