کانگریس کا الیکشن کمیشن کو خط، نانا پٹولے کار حادثہ کی انکوائری کا مطالبہ

ممبئی، 12 اپریل (یو این آئی) کانگریس کے ریاستی صدر نانا پٹولے کی کار گزشتہ منگل کی رات حادثے کا شکار ہوگئی۔ انتخابی مہم سے واپسی کے دوران پٹولے کے قافلے کی کار حادثے کا شکار ہوگئی۔ سیاسی حلقوں میں اب الزامات در الزامات کا سلسلہ جاری ہے ۔ کانگریس نے اب اس حادثہ کو لے کر الیکشن کمیشن کو خط لکھ کر تحقیقات کا مطالبہ کیا ہے ۔لوک سبھا انتخابات کے پہلے مرحلے کی انتخابی مہم سے واپسی کے دوران ودربھ میں ایک بڑا حادثہ پیش آیا ہے ۔ ودربھ کے بھنڈارا ضلع میں انتخابی مہم کے دورے کے دوران کانگریس کے ریاستی صدر نانا پٹولے کے قافلے میں شامل ایک گاڑی کو ٹرک نے ٹکر مار دی۔ خوش قسمتی سے نانا پٹولے بال بال بچ گئے ۔نانا پٹولے کی کار حادثے کو لے کر اب سوالات اٹھ رہے ہیں۔ اس معاملے میں تحقیقات کا مطالبہ کیا گیا ہے ، کانگریس نے مکمل جانچ کا مطالبہ کیا ہے کہ کار حادثہ محض حادثہ تھا یا سازش۔ اس دوران اب کانگریس لیڈروں نے نانا پٹولے کی سیکورٹی بڑھانے کا مطالبہ کیا ہے ۔پرکاش امبیڈکر نے بھی اس ضمن میں شک و شبہ کا اظہار کیا ہے انھوں نے نانا پٹول کی صحت کے لیے نیک خواہشات۔کرتے ہوئے کہا کہ "جب بھی کوئی حادثہ ہوتا ہے ، اس معاملے کو سنجیدگی سے لیا جانا چاہئے ، جب سیاست کی بات ہوتی ہے تو تھوڑی بہت رنجیشیں پائی ہی جاتی ہیں۔ اس لیے پولیس سے تحقیقات کرنا چاہیے ۔ اس ڈرائیور کے بارے میں معلومات لی جائے ۔ مہاراشٹر پولیس کو لیڈروں کو مزید تحفظ فراہم کرنا چاہئے ۔ پرکاش امبیڈکر نے یہ بھی کہا کہ انتخابات کے دوران ایک حادثہ ہوا ہے ، اس لیے شک کی گنجائش ہے ۔