غزہ:تل ابیب کے ساتھ معاہدے کے بارے میں مصری اسرائیل کی بات چیت میں محتاط امید اور مثبت اشارے کے بعد حماس کے ایک ذریعے نے العربیہ/الحدث کو بتایا کہ حماس نے مصری تجویز غزہ کی پٹی میں تحریک کے سربراہ یحییٰ السنوار کو بھیجی ہے۔ہم اس تجویز کے جواب کا انتظار کررہے ہیں جو چند دن میں آسکتا ہے۔
ذرائع نے تصدیق کی کہ حماس غزہ میں جماعت کی قیادت اوربیرون ملک موجود قیادت کے ساتھ جنگ بندی کی کسی بھی تجویز پرمشاورت کررہی ہے۔
قبل ازیں کل ہفتے کو قاہرہ نیوز چینل نے رپورٹ کیا کہ مصر نے حماس کو غزہ کی پٹی میں جنگ بندی کے بدلے 20 سے 40 اسرائیلی قیدیوں کو رہا کرنے کی تجویز پیش کی ہے۔
20 سے 40 قیدیوں کی رہائی کی تجویز
مصر کی جانب سے تیار کی گئی یہ تجویزحماس کو پیش کی گئی تھی، اس پر اسرائیل کے ساتھ تبادلہ خیال کیا گیا تھا۔ اس میں غزہ کی پٹی میں جنگ بندی کے بدلے 20 سے 40 اسرائیلی قیدیوں کو رہا کرنے کے معاملے پر بات کی گئی ہے۔
امکان ہے کہ غزہ میں حماس اور اسرائیل کے درمیان آئندہ چند روز میں کوئی معاہدہ طے پا جائے گا، البتہ ذرائع کا کہنا ہے کہ دونوں متحارب فریقوں کو مصری تجویز کے بعض نکات پر تحفظات ہیں۔اسرائیل کے ایک باخبر ذرائع نے اطلاع دی تھی کہ اسرائیلی وزیر اعظم بنجمن نیتن یاہو کے تحفظات کے باوجود چند دنوں میں مصری تجویز پر کسی معاہدے پر پہنچنا ممکن ہے۔
دوسریر طرف حماس نے کہا ہے کہ غزہ کی پٹی میں جاری جنگ روکنے کے لیے پیش کی گئی کسی بھی تجویز کا خیر مقدم کیا جائے گا۔
تقریباً 129 اسرائیلی قیدی اب بھی محصور فلسطینی انکلیو کے اندر قید ہیں، جن میں سے 34 ہلاک ہو چکے ہیں۔ گزشتہ نومبر کے آخر میں ایک سابقہ معاہدے کے تحت تقریباً 100 کو رہا کر دیا گیا تھا۔
حماس نے ہفتے کے روز کہا کہ حماس اور اسلامی جہاد اور پاپولر فرنٹ کی تحریکوں کے رہنماؤں نے ایک اجلاس کے دوران اسرائیل کے ساتھ قیدیوں کے تبادلے کے لیے سنجیدہ معاہدے تک پہنچنے کی ضرورت پر زور دیا ہے۔ حماس نے مزید کہا کہ اس ملاقات میں حماس کے سیاسی بیورو کے سربراہ اسماعیل ہنیہ، پاپولر فرنٹ کے ڈپٹی سیکرٹری جنرل جمیل مزھر اور اسلامی جہاد کے ڈپٹی سیکرٹری جنرل محمد ھندی نے شرکت کی۔
ملاقات میں اسرائیلی جارحیت کو روکنے، اسرائیلی فوج کے فوری اور مکمل انخلا اور قیدیوں کی رہائی کے لیے کی جانے والی کوششوں پر تبادلہ خیال کیا گیا۔ تینوں تحریکوں کے رہنماؤں نے فلسطینی عوام کے اتحاد کو مضبوط بنانے کے لیے قومی رابطے کی ضرورت پر بھی بات چیت کی۔ حماس نے ہفتہ کو اعلان کیا تھا کہ اسے اپنی تجویز پر اسرائیل کا سرکاری جواب موصول ہوگیا ہے۔ حماس کی جانب سے یہ تجاویز مصر اور قطر کو 13 اپریل کو دی گئی تھیں۔
حماس کے رہنما خلیل الحیہ کے ایک بیان میں کہا گیا ہے کہ تحریک حماس اسرائیل کی طرف سے آنے والی تجویز کا مطالعہ کرے گی اور مطالعہ مکمل ہونے پر اپنا جواب پیش کرے گی۔ قاہرہ نیوز چینل کے مطابق ہفتے کے روز مصر نے حماس کو فلسطینی پٹی میں جنگ بندی کے بدلے 20 سے 40 اسرائیلی قیدیوں کو رہا کرنے کی تجویز پیش کی۔
نیوز چینل کے مطابق کچھ تحفظات کے باوجود امکان ہے کہ غزہ میں تحریک حماس اور اسرائیلی فریق کے درمیان آئندہ چند روز میں کوئی معاہدہ طے پا جائے گا۔
