ابھیشیک شرما کوٹیم میں کیوں نہ جگہ دی جائے ،ہربھجن سنگھ کا ٹیم انڈیا کومشورہ

نئی دہلی ، 9مئی ( آئی این ایس انڈیا ) سن رائزرز حیدرآباد نے لکھنؤ سپر جائنٹس کو 10 وکٹوں سے شکست دی۔ لکھنؤ سپر جائنٹس نے پہلے بلے بازی کرتے ہوئے مقررہ 20 اوورز میں 4 وکٹ پر 165 رنز بنائے۔ جس کے جواب میں سن رائزرس حیدرآباد نے ہدف صرف 9.4 اوورز میں حاصل کرلیا۔اس طرح کے ایل راہل کی قیادت میں لکھنؤ سپر جائنٹس کو عبرتناک شکست کا سامنا کرنا پڑا۔ اس کے ساتھ ہی اوپنرز ٹریوس ہیڈ اور ابھیشیک شرما نے سن رائزرس حیدرآباد کے لیے طوفانی اننگز کھیلی۔ ٹریوس ہیڈ نے 30 گیندوں پر 89 رنز بنائے۔ انہوں نے اپنی اننگز میں 8 چوکے اور 8 چھکے لگائے۔ابھیشیک شرما نے لکھنؤسپر جائنٹس کیخلاف 28 گیندوں میں 75 رنز کی شاندار ناٹ آؤٹ اننگز کھیلی۔ اس بلے باز نے اپنی اننگز میں 8 چوکے اور 6 چھکے لگائے۔ دراصل، یہ پہلا موقع نہیں ہے جب ابھیشیک شرما نے مخالف گیند بازوں کی پٹائی کی ہو۔ اس سیزن میں وہ مسلسل طوفانی انداز میں بیٹنگ کر رہے ہیں۔تاہم اب سابق آف اسپنر ہربھجن سنگھ نے ابھیشیک شرما کے لیے بڑی بات کہی ہے۔ ہربھجن سنگھ نے ٹویٹ کیا اور لکھاکہ حیدرآباد میں کیا شاندار واقعہ ہوا۔ ٹریوس ہیڈ اور ابھیشیک شرما نے اس طرح چھکے مارے جیسے وہ سنگل بھاگ رہے ہوں۔ 165 رنز کا اسکور صرف 9.4 اوورز میں حاصل کر لیا۔ وہ مزید لکھتے ہیں، کیوں نہ ابھیشیک شرما کو ہندوستانی ٹیم کی بینچ اسٹرینتھ میں شامل کرلیا جائے؟ آئی پی ایل کے علاوہ اس پوسٹ میں انہوں نے بی سی سی آئی اور سن رائزرس حیدرآباد کو ٹیگ کیا ہے۔خیال رہے کہ لکھنؤ سپر جائنٹس کو شکست دینے کے بعد سن رائزرس حیدرآباد پوائنٹس ٹیبل میں تیسرے نمبر پر آ گئی ہے۔ اب پیٹ کمنز کی قیادت والی سن رائزرس حیدرآباد کے 12 میچوں میں 14 پوائنٹس ہیں۔اس ٹیم نے اب تک 7 میچز جیتے ہیں جب کہ اسے 5 میچوں میں شکست کا سامنا کرنا پڑا ہے۔