نئی دہلی (سماج نیوز سروس) ملک کے وزیر اعظم نریندر مودی نے بدھ کے روز دہلی کے دوارکا میں ایک عوامی ریلی کو خطاب کیا ۔ اس دوران وزیر اعظم نریندر مودی نے کانگریس اور ا س کی اتحادی پارٹیوں کو جم کر تنقید کا نشانہ بنایا ۔ ساتھ ہی وزیراعظم مودی نے عوام کے سامنے بی جے پی کے ذریعہ کئے گئے ترقیاتی کاموں کا بھی ذکر کیا۔ انھوں نے کہا کہ کانگریس روزانہ 12 کلومیٹر ہائی ویز بناتی تھی، بی جے پی ہر روز 30 کلومیٹر ہائی ویز بناتی ہے۔ کانگریس نے جہاں 60 سالوں میں صرف 70 ہوائی اڈے ہی بنائے۔ جبکہ مودی نے 10 سالوں میں 70 ہوائی اڈے بنائے ہیں۔ 75 فیصد لوگوں کے گھروں میں نل کا پانی ہے۔ ہم نے 22 ایمس، 18 کروڑ گیس کنکشن دیے ہیں۔ واضح ہو کہ لوک سبھا انتخابات کے پیش نظر وزیر اعظم نریندر مودی نے بدھ کو دارالحکومت میں اپنی دوسری ریلی دوارکا، دہلی میں کی۔ اس سے پہلے وزیر اعظم نے شمال مشرقی دہلی میں پہلی عوامی میٹنگ سے خطاب کیا تھا۔ پی ایم مودی کے اسٹیج پر پہنچنے کے بعد حامیوں نے ان کا پرجوش استقبال کیا۔ وزیر اعظم نریندر مودی نے مزید کہا کہ ووٹنگ کے پانچ مرحلوں نے بی جے پی اور این ڈی اے کی مضبوط حکومت کی تصدیق کر دی ہے۔ بی جے پی کو دیا جانے والاہر ووٹ ترقی یافتہ ہندوستان کے عزم کو مضبوط کرے گا۔ انہوں نے مزید کہا کہ آج ملک کے بینک 3 لاکھ کروڑ روپے کا منافع کما رہے ہیں۔ آج اگر دہلی سے ایک روپیہ نکالاجاتا ہے تو 100 پیسے استفادہ کنندہ کے بینک کھاتے میں جمع ہوجاتے ہیں۔ ہم نے ڈی بی ٹی کے ذریعے عوام کو 36 لاکھ کروڑ روپے بھیجے۔ اگر کانگریس ہوتی تو یہ پیسہ دلال کھا جاتے۔ کامن ویلتھ گیمز کو کون بھول سکتا ہے، یہ ملک کی صلاحیت کو دنیا کو دکھانے کا موقع تھا، لیکن کانگریس نے اسے بدعنوانی کا نام دے دیا۔ ہم نے حال ہی میں G-20 کیا، بی جے پی کا ترقیاتی ماڈل نیشن فرسٹ، قومی خدمت ہمارا منتر ہے۔
