نوشاد عباس
علی گڑھ، 24 مئی،سماج نیوز سروس: علی گڑھ مسلم یونیورسٹی کی وائس چانسلر پروفیسر نعیمہ خاتون نے اپنے دفتر میں منعقدہ ایک مختصر تقریب میں ’’ر اور گردن کے کینسر کے مریضوں کی مصنوعی بحالی‘‘اور ’’فوڈ انڈسٹری میں مائکروبیل بایو ٹیکنالوجی‘‘ کے عنوان سے دو کتابوں کا اجرا کیا۔ڈاکٹر زیڈ اے ڈینٹل کالج کے شعبہ پراستھوڈانٹکس کے ڈاکٹر پنکج پرکاش کھراڈے نے ’’پراستھیٹک بحالی‘‘ موضوع پر کتاب کی تدوین کی ہے۔ امریکہ کے اشاعتی ادارے الزیویئر کے ذریعہ شائع یہ جامع گائیڈ، سر اور گردن کے کینسر کے مریضوں کے لیے بحالی کے عمل کے بارے میں گہرائی سے معلومات فراہم کرتی ہے، جس میں تقریباً 850 طبی تصاویر اور شکلیں شامل ہیں۔ یہ کتاب ایک مشترکہ کوشش ہے، جس میں یونیورسٹی آف ٹولیڈو (USA)، اوکیاما یونیورسٹی (جاپان) اور یونیورسٹی آف میری لینڈ (USA) کے ماہرین تعلیم کی شراکت ہے۔ ڈاکٹر کھراڈے، جن کے پاس مصنوعی بازآبادکاری کا 15 سال کا تجربہ ہے، نے ان باوقار اداروں سے ملنے والے تعاون پر اظہار تشکر کیا۔اس موقع پر ڈینٹل کالج اور پلاسٹک سرجری کے شعبہ کے چیئرمین اور کتاب کے شریک مصنف ڈاکٹر فہد خرم بھی موجود تھے۔ایک اور تقریب میں وائس چانسلر پروفیسر خاتون نے کتاب ”مائکروبیل بائیو ٹیکنالوجی ان فوڈ انڈسٹری” کا اجراء کیا جس کی مشترکہ تصنیف شعبہ پوسٹ ہارویسٹ انجینئرنگ، اے ایم یو کے ڈاکٹر فیضان احمد اور پروفیسر صدف زیدی کی طرف سے ہیوسٹن، ٹیکساس میں ایڈوانسڈ ہیلتھ اینڈ ایجوکیشن سروسز آرگنائزیشن کی ڈاکٹر زہرہ ایچ محمد اور فوڈ مائیکروبائیولوجی اینڈ بائیو ٹیکنالوجی لیبارٹری، نارتھ کیرولینا اے اینڈ ٹی اسٹیٹ یونیورسٹی، یو ایس اے کی پروفیسر پروفیسر سلام اے ابراہیم کے ساتھ مل کر ترمیم کی۔ یہ کتاب کھانے کی صنعت میں مائکروبیل بائیو ٹیکنالوجی کے کردار پر ایک جدید نقطہ نظر فراہم کرتی ہے۔اس کتاب میں مائکروبیل بائیو فلمز، فوڈ سے وابستہ مائکروبیل انزائمز، فوڈ انڈسٹری میں مائکروبیل مسائل کو کم کرنے میں بائیوٹیکنالوجی کا کردار، اور کھانے کی خرابی کو کنٹرول کرنے کے لیے جرثومے سے پاک رابطہ سطحوں کا استعمال جیسے اہم موضوعات کا احاطہ کیا گیا ہے۔ڈاکٹر فیضان احمد نے خوراک کے شعبے کے محققین، طلباء اور صنعت کے پیشہ ور افراد کے لیے کتاب کی عملی مطابقت پر زور دیا اور بتایا کہ یہ کتاب 19 ابواب پر مشتمل ہے جسے دنیا بھر کے نامور ماہرین نے تحریر کیا ہے۔فیکلٹی آف ایگریکلچرل سائنسز کے ڈین پروفیسر اکرم اے خان، ڈاکٹر زیڈ آر اے آزاد، چیئرمین، پوسٹ ہارویسٹ انجینئرنگ اینڈ ٹیکنالوجی اور شعبہ کے سینئر ترین ریسرچ اسکالر جناب پیر محمد جنید نے ریلیز کی تقریب میں شرکت کی۔
