رام پور26مئی،سماج نیوز سروس:انتظامیہ نے ٹریفک قوانین کے نفاذ کے لئے نیا حل ڈھونڈ لیا ہے۔ اس کے تحت اب کمرشل گاڑیوں کے ڈرائیوروں کو گاڑی کے کیبن میں اپنی فیملی کی تصویر لگانی ہوگی۔ ایسا کرنے سے ڈرائیور ہمیشہ اپنے خاندان کو ذہن میں رکھے گا۔ انتظامیہ کا خیال ہے کہ اس سے نہ صرف اوور اسپیڈنگ کو روکا جائے گا بلکہ سڑک حادثات میں بھی کمی آئے گی۔ یہ فیصلہ کلکٹریٹ آڈیٹوریم میں منعقدہ روڈ سیفٹی کمیٹی کی میٹنگ میں لیا گیا۔ میٹنگ میں ڈی ایم جوگندر سنگھ نے کہا کہ ضلع میں جن بلیک اسپاٹس کی نشاندہی کی گئی ہے ان پر سیکورٹی سے متعلق کاموں میں تیزی لائی جائے۔ پہلے سے شناخت شدہ بلیک اسپاٹس پر ضروری حفاظتی کام انجام دینے کے لئے محکمہ تعمیرات عامہ کو 5 لاکھ روپے مختص کئے گئے تھے جس کے خلاف ضلع مجسٹریٹ نے اب تک کئے گئے کام کی رپورٹ طلب کی ہے۔ ضلع مجسٹریٹ نے اے آر ٹی او راجیش کمار شریواستو کواحکامات دئیے کہ وہ ٹریفک قوانین کی خلاف ورزی کرنے والوں کے خلاف کارروائی تیز کریں جیسے سیٹ بیلٹ، ہیلمٹ، غلط سمت میں چلنے والی گاڑیاں اور دیگر مختلف اقسام وغیرہ۔رام پور شہر میں روڈ ویز بسوں کے ڈرائیور انہیں روڈ ویز بس اسٹینڈ تک نہیں لے جاتے بلکہ امبیڈکر پارک میں چڑھاتے ہیں۔ ڈی ایم نے اس پر برہمی کا اظہار کیا اور اے آر ایم روڈ ویز کو سخت کارروائی کرنے اور اس بات کو یقینی بنانے کے احکامات دیئے کہ روڈ ویز کی بسیں بس اسٹینڈ کے احاطے میں ہی رکیں تاکہ مسافروں کو کسی قسم کی پریشانی کا سامنا نہ کرنا پڑے۔ اس کے ساتھ ہی انہوں نے اے آر ٹی او کو احکامات دیئے کہ وہ امبیڈکر پارک میں چلنے والی روڈ ویز بسوں کا چالان کریں۔ انہوں نے اے آر ٹی او اور ڈی آئی او ایس کو احکامات دیئے کہ وہ این سی سی اور اسکاؤٹ گائیڈز کے بچوں کو ٹریفک قوانین کے حوالے سے آگاہی مہم میں شامل کریں۔ اس دوران ڈسٹرکٹ اسکول انسپکٹر منے علی اور بی ایس اے سنجیو کمار اور دیگر افسران موجود تھے۔
