دیوبند میں تمباکو نوشی سے نجات عالمی دن منایا گیا

دیوبند، سماج نیوزسروس: دیوبند کے ترقیاتی بلاک آفس میں ایک چھوٹی سی نمائش منعقد کرکے تمباکونشی کو چھوڑنے کا پیغام دیا گیا اور تمباکو نوشی کے مضمرات بتاتے ہوئے اس سے دور رہنے کی اپیل کی گئی۔ بین الاقوامی تمباکو نوشی کو ترک کرنے کے عالمی دن کے موقع پر پرجا پتی برہم کماری ایشوریہ یونیورسٹی کی جانب سے دیوبند کے ترقیاتی بلاک دفتر کے احاطہ میں ایک چھوٹی سی نمائش منعقد کرکے نشہ اور تمباکو نوشی ترک کرنے کا پیغام دیا گیا۔ اس موقع پر نمائش میں شریک لوگوں کو تمباکو کے استعمال سے ہونے والے مضمرات سے آگاہ کرتے ہوئے مختلف پوسٹروں کی مدد سے تمباکو نوشی کے استعمال کو ترک کرنے کا پیغام دیا گیا۔ جمعہ کے روز منعقد ہونے والے پروگرام میں برہم کماری پارول نے تمباکو کے استعمال اور شراب نوشی سے ہونے والے نقصانات کی تفصیلات بیان کیں۔ انہوں نے کہا کہ تمباکو اور شراب سلو پوائزن ہے دوسرے ان اشیاء کے عادی افراد اور ان کے خاندانوں کا چین وسکون برباد ہوجاتا ہے اور ایسے افراد معاشرہ میں بھی بری نگاہ سے دیکھے جاتے ہیں۔ انہوں نے بتایا کہ تمباکو اور شراب نوشی کی وجہ سے ہندوستان میں ہر دن 2500سے 3ہزار افراد اور پوری دنیا میں ہر سال 25لاکھ سے زائد افراد لقمہ اجل بن جاتے ہیں ۔ انہوں نے کہا کہ ہمیں یہ عہد کرنا چاہئے کہ ہم سب نشہ آور اشیاء سے دور رہیں گے اور دوسرے لوگوں کو بھی اس کی ترغیب دیں گے۔ انہوں نے بتایا کہ راج یوگ کی مدد سے آسانی کے ساتھ ان بری عادتوں سے چھٹکارہ پایا جاسکتا ہے۔ اس موقع پر منعقدہ نمائش کا افتتاح کرنے والے بلاک پرمکھ کے نمائندہ وجے تیاگی نے برہم کماری کی ان کوششوں کی ستائش کی ۔ اس موقع پر آیوش، گووردھن، دیپک، جے ویر، مونٹی، کویتا، اروند، انکور ، نشانت اور پردُمن وغیرہ موجود رہے۔