نئی دہلی (یو این آئی )وزیر اعظم نریندر مودی، قائد حزب اختلاف راہل گاندھی، سماج وادی پارٹی کے صدر اکھلیش یادو، ترنمول کانگریس کے سدیپ بندھوپادھیائے اور مختلف سیاسی جماعتوں کے رہنماؤں نے بدھ کو اوم برلا کو دوسری مرتبہ لوک سبھا کا اسپیکر منتخب ہونے پر مبارکباد دی۔اس موقع پر وزیراعظم نریندر مودی نے مسٹر اوم برلا کے 18 ویں لوک سبھا کے لئے اسپیکر منتخب ہونے پر انہیں مبارکباد پیش کرتے ہوئے کہا ‘‘ یہ ایوان کی خوش قسمتی ہے کہ آپ دوسری بار اس عہدے پر فائز ہوئے ہیں۔ آپ کو میری طرف سے اور پورے ایون کی طرف سے بہت بہت مبارکباد ۔ امرتکال کے اس دور میں آپ کا لگاتار دوسری بار لوک سبھا کا اسپیکر منتخب ہونا قابل فخر بات ہے ۔ ’’وزیراعظم نے اس یقین کا اظہار کیا کہ مسٹر برلا اپنے شاندار تجربے سے ہم سب کی رہنمائی کریں گے اور ایوان کو خوش اسلوبی سے چلانے میں ان کا اہم رول ہوگا۔ اس کے ساتھ ہی انہوں نے کہا کہ انہیں اس بات کا پورا یقین ہے کہ مسر برلا 18 ویں لوک سبھا میں نیا ریکارڈ بناکر نئی تاریخ رقم درج کریں گے اور ان کا لگاتار دوسری بار اسپیکر بننا بھی ایک ریکارڈ ہے ۔ کیونکہ ماضی میں لوک سبھا کے اسپیکر یا تو دوبارہ الیکشن نہیں لڑے یا پھر وہ الیکشن ہارگئے اس لئے لگاتار دوبارہ اسپیکر بننا بھی بہت مشکل کام ہے ۔ انہوں نے کہا کہ اس سے قبل آنجہانی بلرام جاکھڑ کو یہ سعادت حاصل ہوئی تھی جو لگاتار دوسری بار اسپیکر منتخب ہوئے اور انہوں نے اپنی دوسری میعاد کے پانچ برس مکمل کئے تھے ۔ مسٹر مودی نے کہا کہ مسٹر برلا کا بطور ممبر پارلیمنٹ کا کام بھی قابل تعریف رہا ہے ، جنہوں نے صحت مند ماں اور صحت مند بچہ کے شعبے میں بھی گرانقدر خدمات انجام دی ہیں اور اپنے پارلیمانی حلقہ کوٹہ کے لوگوں کو انہوں نے بہت فیض پہنچایا ہے ۔ اس کے ساتھ ہی انہوں نے کھیل کود کو بھی کافی فروغ دیا ہے ۔ انہوں نے کہا کہ کووڈ کی خوفناک وبا کے دوران مسٹر برلا تمام اراکین پارلیمنٹ کو فون کرکے ان کی خیریت دریافت کرتے رہے ۔ وزیراعظم نے کہا کہ مسٹر برلا کی قیادت میں 17 ویں لوک سبھا کا عمل تاریخ کا سنہرا دور رہا اور جب لوک سبھا کی تاریخ لکھی جائے گی، 17 ویں لوک سبھا کو سنہرے دور کے طور پر درج کیا جائے گا۔وزیراعظم مودی نے کہا کہ مسٹر برلا کی قیادت میں 17 ویں لوک سبھا میں جو شاندار کام ہوئے ، وہ گزشتہ 70 برسوں میں نہیں ہوئے ۔ انہوں نے کہا کہ اس دوران جموں و کشمیر کی تشکیل نو، مسلم خواتین سے متعلق بل، وومن ریزرویشن بل ، ملک کے مفاد میں کئی سماجی و اقتصادی بل سمیت بہت سے اہم بل پا س کئے گئے ، جس کی وجہ سے 17 ویں لوک سبھا پر ملک کو ناز ہے اور آئندہ بھی ناز رہے گا۔ قبل ازیں آج ایوان کی کارروائی شروع ہوتے ہی وزیراعظم نریندر مودی نے لوک سبھا کا اسپیکر منتخب کرنے کے لئے مسٹر برلا کے نام کی تجوییز پیش کی ۔ وزیر دفاع راج ناتھ سنگھ، وزیرداخلہ امت شاہ سمیت قومی جمہوری اتحاد (این ڈی اے ) میں شامل تقریباًً تمام جماعتوں نے ان کی تجویز کی تائید کی۔دوسری طرف حزب اختلاف کی جماعتوں نے اسپیکر کے عہدے کے لئے رکن پارلیمنٹ کے ۔ سریش کے نام کی تجویز پیش کی اور انڈیا اتحاد میں شامل تقریباً تمام جماعتوں نے اس تجویز کی تائید کی۔ لیکن پروٹیم اسپیکر بھرترہری مہتاب نے صوتی ووٹ کے ذریعے مسٹر اوم برلا کو ویں 18 لوک سبھا کے طور پر منتخب قرار دیا۔
