سید پرویز قیصر
یورو ٖفٹ بال2024 میں پہلا کوارٹر فائنل میزبان جرمنی اور اسپین کے مابین اسٹوٹ گارٹ کے ایم ایچ پی ارینا میں جمعہ(5 جولائی) کو کھیلا جائے گا۔ جرمنی نے دوسرے راونڈ میں ڈنمارک کو 2–0 سے شکست دیکر کوارٹر فائنل میں جگہ بنائی ہے جبکہ اسپین نے جارجیا کے خلاف 4–1 سے کامیابی حاصل کرکے آخری آٹھ ٹیموں میں جگہ حاصل کی ہے،دونوں ٹیموں کے درمیان ابھی تک جو26 بین الاقوامی میچ کھیلے گئے ہیں اس میں جرمنی نے نو میچوں میں اور اسپین نے آٹھ میچوں میں جیت حاصل کی ہے۔دونوں کے درمیان نو میچ برابر رہے ہیں۔ اسپین نے ان میچوں میں32 گول کئے ہیں جبکہ جرمنی نے اس سے ایک گول کم کیا ہے۔
یورو کپ میں دونوں کا مقابلہ ابھی تک پانچ مرتبہ ہوا ہے جس میں دونوں نے دو۔دو میچ جیتے ہیں اور ایک میچ برابر کھیلا ہے۔ جرمنی نے ان میچوں میں پانچ گول کئے ہیں اور اسکے خلاف تین گول ہوئے ہیں۔ دونوں ٹیموں کے درمیان آخری بین الاقوامی میچ عالمی کپ میں27 نومبر2022 کو کھیلا گیا تھا جو1-1 گول سے برابر رہا تھا۔
یورو کپ میں دونوں کے درمیان پہلا میچ24 اپریل1976 کو کھیلا گیا تھا جو 1-1 گول سے برابر رہا تھا۔ اسی ٹورنامنٹ میں جب دونوں کا مقابلہ 22 مئی1976 کو کوارٹر فائنل میں ہوا تھا تو جرمنی نے 2-0 سے کامیابی اپنے نام کی تھی۔ اسپین نے جرمنی کے خلاف یورو کپ میں پہلی جیت20 جون 1984 کو گروپ میچ میں کی تھی۔ اس نے اس میچ میں1-0 سے جیت اپنے نام کی تھی۔ جرمنی نے17 جون 1988کو گروپ میچ میں2-0 سے ہرایا تھا۔ اسپین نے جرمنی کے خلاف29 جون2008 کو فائنل میں 1–0 سے شکست دی تھی۔
دوسرا کوارٹر فائنل ہمبرگ میں پرتگال اور فرانس کے مابین کھیلا جائے گا۔ پرتگال نے دوسرے روانڈ میں سلووینیا کو پنالٹی شوٹ آوٹ میں3-0 سے شکست دیکر کوارٹر فائنل میں جگہ بنائی ہے ۔ اس میچ میں دونوں ٹیمیں فاضل وقت کے بعد تک کوئی گول نہیں کرسکی تھیں۔ فرانس نے بلجیم کے خلاف دوسرے راونڈ میں1–0 سے شکست دیکر آخری آٹھ ٹیموں میں جگہ حاصل کی ہے۔
پرتگال اور فرانس کے درمیان ابھی تک جو28 بین الاقوامی میچ ہوئے ہیں اس میںفرانس نے19 میچ اور پرتگال نے چھ میچ جیتے ہیں۔ دونوں کے درمیان تین میچ برابر رہے ہیں۔ فرانس نے52 اور پرتگال نے31 گول کئے ہیں۔ یورو کپ میں دونوں کا مقابلہ چار مرتبہ ہوا ہے جس میں فرانس نے دو میچ جیتے ہیں۔ فرانس نے ایک میچ میں کامیابی حاصل کی ہے اور د و میچ برابر رہے ہیں۔ ٖفرانس نے ان میچوں میں سات گول کئے ہیں اور اسکے خلاف چھ گول ہوئے ہیں۔23 جون1984 میں دونوں کا پہلا مقابلہ سیمی فائنل میں ہوا تھا جس میں فرانس نے فاضل وقت میں 3-2 سے جیت اپنے نام کی تھی۔ 28 جون2000 کو ہوئے سیمی فائنل میں فرانس نے 2-1 سے جیت اپنے نام کی تھی۔ پرتگال نے فرانس کے خلاف واحد کامیابی10 جولائی 2016 کو فائنل میں حاصل کی تھی۔ پرتگال نے فاضل وقت میں یہ گول کیا تھا۔23 جون2021 کو لیگ میں کھیلا گیا میچ دونوں ٹیموں کا آخری بین الاقوامی میچ تھا۔ یہ میچ کسی فیصلہ کے ختم ہوا۔ دونوں ٹیموں نے دو۔دو گول کئے تھے۔54,886 تما شائی اس میچ کو دیکھنے بودا پسٹ کے پسکاس ایرینا میں آئے تھے۔
