ممبئی ( آئی این ایس انڈیا )انٹرنیشنل کرکٹ کونسل (آئی سی سی) کا سالانہ جنرل اجلاس (AGM) آج (19 جولائی) سے 22 جولائی تک سری لنکا میں منعقد ہونا ہے۔ رپورٹ کے مطابق اس میٹنگ میں فیصلہ کیا جائے گا کہ جئے شاہ آئی سی سی کے اگلے چیئرمین بنیں گے۔ایک اور رپورٹ میں یہ دعویٰ بھی کیا جا رہا ہے کہ 2025 کی چیمپئنز ٹرافی کی میزبانی بھی پاکستان سے چھن سکتی ہے۔ آئی سی سی کی اے جی ایم میں کئی اہم امور زیر بحث آئیں گے۔رپورٹ کے مطابق، بی سی سی آئی سکریٹری جئے شاہ کا آئی سی سی چیئرمین بننا تقریباً طے ہے۔ رپورٹ میں آئی سی سی سے متعلق ذرائع کے حوالے سے بتایا گیا ہے کہ اب سوال صرف یہ ہے کہ وہ چیئرمین کب بنیں گے۔ بی سی سی آئی سکریٹری کے طور پر ان کا ایک سال باقی ہے۔ اس کے بعد ان کا وقفہ ہو گا۔ بی سی سی آئی کے قوانین کے مطابق ان کا کولنگ آف پیریڈ ہوگا۔ اگر وہ 2025 میں عہدہ سنبھالتے ہیں تو موجودہ چیئرمین بارکلے دسمبر میں اپنی تیسری مدت پوری نہیں کر پائیں گے۔ بھاسکر کی رپورٹ میں ذرائع کے مطابق بتایا گیا ہے کہ 2025 کی چیمپئنز ٹرافی اب سری لنکا یا دبئی میں کھیلی جا سکتی ہے۔ تاہم اس سے قبل رپورٹس آئی تھیں کہ 2025 کی چیمپئنز ٹرافی ہائبرڈ ماڈل میں کھیلی جائے گی۔ ہائبرڈ ماڈل کے تحت ٹیم انڈیا اپنے میچ پاکستان کے بجائے کسی اور ملک میں کھیلے گی۔ یہ بھی کہا جا رہا تھا کہ ٹیم انڈیا چیمپئنز ٹرافی میں اپنے میچ سری لنکا یا دبئی میں کھیل سکتی ہے۔ تاہم اب پورا ٹورنامنٹ دبئی یا سری لنکا میں ہو سکتا ہے۔خیال رہے کہ اس سے قبل ایشیا کپ 2023 کی میزبانی بھی پاکستان کے ہاتھ میں تھی۔ تاہم ٹیم انڈیا نے ایشیا کپ کے لیے پاکستان جانے سے صاف انکار کر دیا تھا۔ پھر یہ ٹورنامنٹ ہائبرڈ ماڈل میں کھیلا گیا۔ ہندوستان نے 2023 ایشیا کپ میں اپنے میچ سری لنکا میں کھیلے۔ بھارت اور پاکستان کے درمیان میچ سری لنکا میں بھی کھیلا گیا۔
