نوح،میوات،یکم اگست ،سماج نیوز سروس: ہریانہ اسٹاف سلیکشن کمیشن کے ذریعہ اشتہار نمبر 2/2023 کے جاری کئے گئے ٹی جی ٹی اساتذہ کے فائنل نتائج کے بعد ضلع نوح کے اسکولوں کو میوات کیڈر کے تحت مختلف سبجیکٹ کے کل 917اساتذہ مل گئے ہیں۔ خاص بات یہ ہے کہ ان اساتذہ کرام میں 77(میوات و ہریانہ کیڈر) ٹی جی ٹی اردو کے ٹیچرز کی بھی تقرری عمل میں آئی ہے۔ اردو ٹی جی ٹی کے عہدے پر تقرر ہونے والے زیادہ تر نوجوانوں کا تعلق خطہ میوات سے ہے۔ پہلی مرتبہ ایک ساتھ ا تنی بڑی تعداد میں علاقہ کے نوجوانوں کی ہوئی اس تقرری سے علاقہ کے عوام خصوصاً اہل اردو میں زبردست خوشی دیکھی جارہی ہے۔ میوات کی سرکردہ شخصیات نے نو تقرراساتذہ کو مبارکباد پیش کرتے ہوئے صوبائی حکومت کا شکریہ ادا کیا ہے۔ علاقہ کی معزز شخصیت مؤرخ صدیق احمد میؤ و ڈاکٹر قمرالدین ذاکر نے خوشی کا اظہار کرتے ہوئے کہا کہ نئے اساتذہ کی تقرری سے نہ صرف میوات کے اسکولوں میں خالی عہدے پر ہوں گے و طلباء کی بڑھائی بہتر طریقے سے ہو سکے گی، بلکہ نیتی آیوگ کی رپورٹ میں ملک کا سب سے پسماندہ ضلع نوح کی پسماندگی کو دور کرنے بھی یہ بھرتی اہم رول ادا کرے گی۔ میوات میں اردو کی ترقی و ترویج کے لیے سرگرم ’تنظیم فروغ اردو میوات‘ کے صدر و تقرری کو لیکر روز اول سے ہی فکرمند رہے تنظیم کے صدر مولانا محمدصدیق سنابلی نے نمائندے سے اپنی خاص بات چیت میں کہا کہ واقعی حکومت کا یہ قابل تعریف قدم ہے کیونکہ کسی بھی علاقہ کی پسماندگی کو صرف تعلیم کے ذریعہ ہی دور کیا جاسکتا ہے۔ 18پی جی ٹی اردو کی تقرری کے بعد اب ٹی جی ٹی کے 77 اردو اساتذہ کی تقرری حکومت کا اردو زبان کے تئیں سچی محبت کا ثبوت ہے۔ انہوںنے کہا کہ کارکنان تنظیم کی محنت و کاوشوں کا ہی یہ نتیجہ ہے جنہوںنے اسکول اسکول جاکرایم آئی ایس پارٹل پر طلباء کو اردو زبان دلائی جس کے بعد ہی یہ عہدے منظور ہوسکے۔ اردو اساتذہ کی ان تقرریوںسے جہاں میوات میں اردو زبان کو فروغ ملے گا وہیں میوات کی تعلیمی شرح میں بھی اضافہ یقینی ہے۔
