رانچی (یو این آئی) جھارکھنڈ اسمبلی کے مانسون اجلاس کے دوران جمعرات کو اپوزیشن ارکان کی طرف سے زبردست ہنگامہ آرائی دیکھنے میں آئی۔ اس کے بعد اسمبلی اسپیکر رابندر ناتھ مہتو نے بی جے پی کے 18 ارکان کو 2 اگست کی دوپہر 2 بجے تک ایوان کی کارروائی سے معطل کردیا۔ اس سے پہلے آج صبح 11:00 بجے ایوان کی کارروائی شروع ہونے کے ساتھ ہی جھارکھنڈ مکتی مورچہ کے سدیویہ کمار سونو نے بی جے پی ممبران اسمبلی کے رویہ پر ناراضگی ظاہر کی اور اسمبلی اسپیکر سے کارروائی کا مطالبہ کیا۔ انہوں نے کہا کہ بی جے پی ایم ایل اے نے جس طرح سے پارلیمانی روایت کے خلاف برتاؤ کیا ہے وہ قابل مذمت ہے اور اسمبلی کے اسپیکر کو ان سب کے خلاف قانون ساز اسمبلی کے آپریٹنگ رولز کے مطابق کارروائی کرنی چاہئے ۔ دوسری جانب بی جے پی کے ایم ایل اے ویل میں آگئے اور نعرے لگانے لگے ۔ اس سے ناراض ہو کر اسمبلی اسپیکر نے اننت اوجھا، ویرانچی نارائن اور سی پی سنگھ سمیت 18 بی جے پی اراکین کو کل دوپہر 2 بجے تک معطل کر دیا۔ اسمبلی کے اسپیکر نے کہا کہ ایوان کی اخلاقیات کمیٹی معاملے کی تحقیقات کرے گی۔ اس کے ساتھ ہی اسمبلی کے اسپیکر نے ایوان کی کارروائی آج دوپہر 12:30 بجے تک ملتوی کر دی۔ جن ایم ایل اے کو معطل کیا گیا ان میں ویرانچی نارائن، اننت اوجھا، رندھیر سنگھ، نارائن داس، کیدار ہزارا، کشون داس، سی پی سنگھ، نویو جیسوال، امت منڈل، کوچے منڈا، بھانو پرتاپ شاہی، ششی بھوشن مہتا، آلوک چورسیا، پشپا دیوی، نیرا یادو، اپرنا سینگپتا، راج سنہا اور سماری لال شامل ہیں۔
