علی گڑھ ،سماج نیوز سروس: قومی یوم خلا کے حوالہ سے علی گڑھ مسلم یونیورسٹی (اے ایم یو) کے مختلف شعبہ جات اور اسکولوں میں تقریبات کا سلسلہ جاری ہے۔اسی کڑی میں ذاکر حسین کالج آف انجینئرنگ اینڈ ٹکنالوجی کے سر سید اے ایم یو نینو سیٹلائٹ پروجیکٹ کے ٹیم ممبران نے علی گڑھ کے مختلف اسکولوں کے بچوں کے لیے ایک بیداری پروگرام کا انعقاد کیا، جس میں اے ایم یو کے زیر انتظام اسکولوں کے طلباء بھی شریک ہوئے۔خیال رہے کہ قومی یوم خلا ، 23 اگست 2023 کو ہندوستان کے مشن چندریان-3 کے وکرم لینڈر کے چاند پر اترنے کی یاد میں منایا جارہا ہے۔اے ایم یو روبو کلب کے ممبران نے کوآرڈینیٹر پروفیسر اکرام خان ،شعبہ الیکٹرانکس کی رہنمائی میں اسکولی بچوں کے ساتھ بات چیت کی اور انہیں ہندوستانی سیٹلائٹ سسٹم کے مختلف پہلوؤں اور ہندوستان کے مختلف چاند مشن کے بارے میں بتایا۔ اس کے ساتھ ہی ایک خصوصی سیٹلائٹ کے ڈیزائن اور فیبریکیشن کے بارے میں بچوں کو معلومات فراہم کی گئیں، جسے روبو کلب اس سال کے آخر تک لانچ کرنے کا ارادہ رکھتا ہے۔ مختلف اسکولوں کے طلباء کے لیے کوئز پروگرام بھی منعقد کیا گیا۔واضح رہے کہ اے ایم یو میں قومی یوم خلاء کے سلسلہ میں منعقد کی جانے والی تقریبات کی نگرانی کے لئے وائس چانسلر پروفیسر نعیمہ خاتون نے ایک کمیٹی تشکیل دی ہے جس کے چیئرمین اور کنوینر بالترتیب پروفیسر ایم سالم بیگ، ڈین، فیکلٹی آف انجینئرنگ اینڈ ٹکنالوجی اور پروفیسر اکرام خان ہیں۔
