دیوبند (سماج نیوز سروس) دیوبند کے قدیم عصری تعلیم کے ادارہ اسلامیہ انٹر کالج کے احاطہ میں منعقدہ بھارت اسکائوٹ گائڈ اترپردیش سہارنپور کے زیر اہتمام ضلع سکریٹری دیپک کمار گپتا وکمشنر مینک شرما کی قیادت میں چلنے والے تین روزہ کیمپ کی اختتامی تقریب کا آغاز اسلامیہ انٹر کالج دیوبند کے پرنسپل ارشد زماں کے بدست عمل میں آیا۔ تقریب کا آغاز جھنڈا گیت پیش کرکے اور جھنڈا لہراکر کیا گیا۔ انہوں نے اسکائوٹ گائڈ کو ڈسپلن میں رہنے ، ملک اور سماج کی خدمت کا جذبہ پیدا کرنے نیز اچانک پیش آنے والے حادثات میں اپنا مکمل تعاون دینے کے لئے راغب کیا اور کیمپ میں سکھائی جانے والی چیزوں اور طور طریقوں کو اپنی زندگی میں ڈھالنے کا مشورہ دیا۔ کیمپ کنوینر راج پال سنگھ پنڈیر اور اسکائوٹ ٹیچر محمد زاہد اختر نے کہا کہ اسکائوٹ گائڈ کیمپ میں ٹریننگ کے دوران سکھائے جانے والے کاموں اور سرگرمیوں سے طلبہ وطالبات میں مختلف تکنیکی معلومات ہونے سے معلومات میں اضافہ ہوتاہے۔ اس تین روزہ کیمپ میں ٹرینر راج پال سنگھ پنڈیر ، محمد زاہد اختر، گائڈ کیپٹن ، ونشکا پنڈیر اور فرحانہ نے اسکائوٹ ٹریننگ ، جھنڈے کے آداب ، حلف لینا، وردی کو مخصوص طریقے سے پہننا، جھنڈے کو تیارکرنا، صفائی ستھرائی ، ٹینٹ تیار کرنا، ٹینٹ کو کھولنا اور لپیٹنا، فرسٹ ایڈ اور دیگر کاموں سے متعلق طلبہ وطالبات کو ٹریننگ دی۔ پروگرام کے آخر میں اسلامیہ انٹر کالج کے پرنسپل نے کیمپ میں شریک سبھی طلبہ وطالبات کے بہتر مستقبل کے لئے نیک خواہشات پیش کرتے ہوئے کہا کہ طلبہ ٹریننگ کیمپ میں سکھائے جانے والے طور طریقوں کو عملی طور پر اپنائیں ۔ بعد ازاں قومی گیت کے ساتھ کیمپ کا اختتام کیاگیا ۔ اس موقع پر ظہیرالدین ، سنجے شرما، گل صنور، یامین خاں، محمد اکرم اور دیگر اسٹاف موجود رہا۔
