بیجنگ: چین میں ایک بحری جہاز میں ہولناک دھماکے سے مصروف ترین بندرگاہ ننگبو ژوشان لرز کر رہ گئی، دھماکے کی ویڈیو وائرل ہوئی ہے۔غیر ملکی میڈیا رپورٹس کے مطابق دنیا کی مصروف ترین سمجھی جانے والی چینی بندرگاہ پر تائیوان کے ایک کنٹینر شپ میں دھماکا ہوا، وائرل ویڈیو میں جہاز سے خوف ناک شعلے بلند ہوتے دیکھے جا سکتے ہیں۔چین کی ننگبو ژوشان بندرگارہ پر ہونے والے دھماکے کی شدت ایک کلومیٹر دور تک محسوس کی گئی، دھماکے کے وقت اس جہاز کے نزدیک سے لائبیریا کا پرچم بردار جہاز گزر رہا تھا، تاہم وہ جہاز محفوظ رہا۔جس جہاز میں دھماکا ہوا ہے وہ تائیوان کی کنٹینر شپنگ کمپنی یانگ مِنگ میرین ٹرانسپورٹ کی ملکیت تھا، واقعے میں کسی جانی نقصان کی اطلاع نہیں ملی ہے، متاثرہ جہاز پر امدادی کارروائیاں جاری ہیں، بتایا جا رہا ہے کہ جہاز کے عملے کو بحفاظت نکال لیا گیا تھا۔ژی جیانگ صوبے کی ایمرجنسی مینجمنٹ ایڈمنسٹریشن نے بتایا کہ دھماکا جمعہ کی دوپہر تقریباً 1 بجکر 40 منٹ پر وائی ایم موبیلٹی نامی کنٹینر جہاز کے اگلے حصے کے قوس پر ہوا، جہاز خطرناک مواد لے کر جا رہا تھا، تاہم، حکام نے یہ نہیں بتایا کہ وہ کیا تھا۔
