نئی دہلی ( آئی این ایس انڈیا) پیرس اولمپکس 2024 میں تاریخ رقم کرنے کے بعد، ہندوستانی خاتون ریسلر ونیش پھوگاٹ آج ہفتہ کو صبح 10:30 بجے دہلی ایئرپورٹ پہنچیں۔ جہاں ان کا پرتپاک استقبال کیا گیا۔ اس دوران ونیش کے ساتھی بجرنگ پونیا اور ساکشی ملک بھی وہاں موجود رہے، جنہوں نے انہیں پھولوں کا گلدستہ دے کر ہندوستان میں خوش آمدید کہا۔ونیش کے ہزاروں چاہنے والوں کو ایئرپورٹ کے باہر دیکھا گیا۔ ونیش جب ہندوستان آئیں تو ان کے مداحوں نے ڈھول بجا کر ان کا استقبال کیا۔ اس دوران ان کی دوست ساکشی ملک اور ان کے رشتہ دار اور قریبی دوست بجرنگ پونیا کو ایئرپورٹ کے باہر ونیش کا انتظار کرتے دیکھا گیا۔ونیش پھوگاٹ نے پیرس اولمپکس 2024 میں خواتین کے 50 کلوگرام فری اسٹائل ریسلنگ کے فائنل میں پہنچی تھی۔ ساتھ ہی انہوں نے تاریخ رقم کی اور ریسلنگ کے فائنل میں پہنچنے والی پہلی ہندوستانی خاتون ریسلر بن گئیں۔ لیکن فائنل میچ کی صبح ونیش کا وزن زیادہ پایا گیا اور انہیں نااہل قرار دے دیا گیا۔ آپ کو بتا دیں کہ پہلے دن ونیش کا وزن 49.9 کلوگرام تھا۔انہوں نے تین پہلوانوں سے مقابلہ کیا اور فائنل میں جگہ بنائی۔ اگلے دن ان کا وزن 50.100 کلو گرام پایا گیا اور انہیں فائنل میچ کھیلنے کے لیے نااہل قرار دے دیا گیا۔ اس فیصلے کے خلاف ونیش اور آئی او اے نے سی اے ایس میں مشترکہ چاندی کے تمغے کا مطالبہ کیا تھا۔ اس کے بعد سی اے ایس نے ونیش کی اپیل کو سماعت کے لیے قبول کر لیا تھا؛ لیکن فیصلہ ونیش کے حق میں نہیں آیا اور آخر کار سی اے ایس نے ان کے چاندی کے تمغے کے مطالبے کو مسترد کر دیا۔اس کے بعد پیرس اولمپکس میں کوٹ میں شیرنی کی طرح لڑتی نظر آنے والی ہندوستان کی بیٹی پیرس سے خالی ہاتھ واپس آئی ہے، لیکن ہارنے کے بعد بھی انہوں نے کروڑوں ہندوستانیوں کے دل جیت لیے ہیں،کیوں کہ انہوں نے پیرس میں جو کارنامہ کر دکھایا ہے وہ پورے ملک سے مخفی نہیں ہے۔
دریں اثنا اسٹار ہندوستانی پہلوان ونیش پھوگاٹ پیرس اولمپکس 2024 میں خواتین کے 50 کلوگرام ریسلنگ کے فائنل میں 100 گرام زیادہ وزن پائے جانے پر نااہل ہونے کے بعد ہفتہ کو دہلی واپس آگئیں۔ وطن واپسی پر ان کا شاندار استقبال کیا گیا۔ ان کے گاؤں کے ہزاروں لوگ ان کے استقبال کے لیے ہوائی اڈے پر جمع تھے۔ پیرس سے بغیر میڈل کے واپس آنے والی بھارت کی بیٹی دہلی کے اندرا گاندھی انٹرنیشنل ایئرپورٹ پر شاندار استقبال دیکھ کر جذباتی ہو گئی۔ریسلنگ فائنل میں پہنچنے کے باوجود تمغوں سے محروم رہنے والے بھارتی ریسلرزافسردہ دل کے ساتھ دہلی ایئرپورٹ پر اترے۔ ائیرپورٹ پر ان کے استقبال کے لیے ہزاروں لوگ موجود تھے۔ اس دوران ونیش اپنے پرانے ساتھی پہلوان بجرنگ پونیا اور ساکشی ملک کو گلے لگا کر پھوٹ پھوٹ کر رونے لگیں۔بجرنگ اور ساکشی نے ونیش کی حوصلہ افزائی کی اور اسے ایک چمپئن محسوس کرایا۔ ونیش کا یہ ویڈیو سوشل میڈیا پر وائرل ہو رہا ہے۔دہلی ہوائی اڈے سے ونیش نے کھلی جیپ میں ہریانہ کے چرخی دادری ضلع میں واقع اپنے گاؤں بلالی تک روڈ شو کیا۔ اس دوران بجرنگ پونیا، ساکشی ملک سمیت کئی دوست ان کے ساتھ رہے۔ سڑک کے دونوں طرف موجود لوگوں کے ہجوم نے ملک کی بیٹی کی حمایت میں نعرے لگائے۔ فائنل میں پہنچ کر تاریخ رقم کرنے والے اس چمپئن ریسلر پر سب کو فخر ہے۔لندن اولمپکس میں کانسی کا تمغہ جیتنے والے شوٹر گگن نارنگ، جنہوں نے پیرس میں ہندوستانی دستے کے شیف ڈی مشن کے طور پر خدمات انجام دیں، نے پیرس کے ہوائی اڈے پر فوگاٹ کے ساتھ ایک تصویر شیئر کرتے ہوئے انہیں چمپئن قرار دیا۔ یہ دونوں ایک ہی فلائٹ میں واپس دہلی جا رہے تھے۔ نارنگ نے ایکس پر لکھاکہ وہ پہلے دن سے ہی خیل گاؤں میں ایک چمپئن کے طور پر آئی تھیں اور وہ ہمیشہ ہماری چمپئن رہیں گی۔ کبھی کبھی آپ کو ایک ارب خوابوں کو متاثر کرنے کے لیے اولمپک تمغے کی ضرورت نہیں ہوتی۔ ونیش پھوگٹ، آپ نے نسلوں کو متاثر کیا ہے۔ آپ کی ہمت کو سلام۔
