سید پرویز قیصر
پاکستان اور بنگلہ دیش کے درمیان راولپنڈی میں جاری پہلے ٹسٹ کے دوسرے دن محمد رضوان نے شاندار بلے بازی کا مظاہرہ کرتے ہوئے241 بالوں پر گیارہ چوکوں اور تین چھکوں کی مدد سے آوٹ ہوئے بغیر171 رن بنائے۔یہ اسکور ٹسٹ کرکٹ میں ان کا سب سے زیادہ اسکور ہونے کے ساتھ ساتھ کسی پاکستانی وکٹ کیپر کا تیسرا سب سے بڑا انفرادی اسکور ہے۔
پاکستان کی جانب سے سب سے بڑا اسکور کرنے والے وکٹ کیپر تسلیم عارف ہیں جنہوں نے آسڑیلیا کے خلاف فیصل آباد میں مارچ 1980 میں پاکستان کی پہلی اننگ میں435 منٹ میں379 بالوں پر20 چوکوں کی مدد سے آوٹ ہوئے بغیر210 رن بنائے تھے۔ انکی اس ڈبل سنچری کی بدولت پاکستان نے اپنی پہلی اننگ میں126 اوور میںدو وکٹ پر 382 رن بنائے تھے۔ آسڑیلیا نے اپنی پہلی اننگ میں211 اوور میں617 رن بنائے تھے۔ یہ ٹسٹ کسی فیصلہ کے بغیر ختم ہوا تھا۔
ٹسٹ کرکٹ میں پاکستان کیجانب سے ڈبل سنچری اسکور کرنے والے پہلے وکٹ کیپر امتیاز احمد تھے جنہوں نے نیوزی لینڈ کے خلاف لاہور میں اکتوبر1955 میں ہوئے ٹسٹ میں پاکستان کی پہلی اننگ میں380 منٹ میں28 چوکوں کی مدد سے209 رن بنائے تھے۔ انکی اس شاندار اننگ کی بدولت پاکستان نے اپنی پہلی اننگ میں185.3 اوور میں561 رن بنائے تھے۔ پاکستان نے اس ٹسٹ میچ میں چار وکٹ سے جیت حاصل کی تھی۔
پاکستان کی جانب سے ابھی تک پانچ وکٹ کیپروں نے چھ مرتبہ 150 رن سے بڑی اننگ کھیلی ہے۔ کامران اکمل نے ایسا دو مرتبہ کیا ہے۔ انہوں نے پہلی مرتبہ ایسا لاہور میں انگلینڈ کے خلاف نومبر2005 میں کھیلے گئے میچ میں کیا تھا۔ وہ326 منٹ میں242 بالوں پر14 چوکوں کی مدد سے154 رن بنانے میں کامیاب رہے تھے۔ انہوں نے آٹھویں نمبر پر بلے بازی کرتے ہوئے ایسا کیا تھا۔ پاکستان نے اپنی واحد اننگ 156.2 اوور میں آٹھ وکٹ پر 636 رن بناکر ڈکلیر کی تھی اور ٹسٹ میچ میں ایک اننگ اور100 رن سے جیت حاصل کی تھی۔ دائیں ہاتھ کے اس وکٹ کیپر بلے باز نے کراچی میں سری لنکا کے خلاف فروری2009 میں ہوئے ٹسٹ میں247 منٹ میں184 بالوں پر آٹھ چوکوں اور پانچ چھکوں کی مدد سے آوٹ ہوئے بغیر158 رن بنائے تھے۔اس مرتبہ انہوں نے ساتویں نمبر پر بلے بازی کی تھی۔ یہ ٹسٹ کسی فیصلہ کے ختم ہوا تھا۔ راشد لطیف نے ویسٹ انڈیز کے خلاف شارجہ میں جنوری2002 میں ہوئے ٹسٹ میچ میں324 منٹ میں234 بالوں پر18 چوکوں اور ایک چھکے کی مدد سے پورے150 رن بنائے تھے۔پاکستان نے اس ٹسٹ میچ میں 170 رن سے کامیابی حاصل کی تھی۔
پاکستان کے کپتان شان مسعود اگر113 اوور میں چھ وکٹ پر 448 رن بناکر اپنی اننگ ڈکلیر نہیں کرتے تو محمد رضوان اپنی پہلی ڈبل سنچری بنانے میں آسانی سے کامیاب ہوسکتے تھے۔ اس سے پہلے دائیں ہاتھ کے وکٹ کپیر بلے باز کا ٹسٹ کرکٹ میں سب سے زیادہ اسکور آوٹ ہوئے بغیر 115* رن تھا جو انہوں نے جنوبی افریقہ کے خلاف راولپنڈی میں فروری 2021 میں 292 منٹ میں 204 بالوں پر 15 چوکوں کی مدد سے پاکستان کی دوسری اننگ میں بنایا تھا۔ اس ٹسٹ میں پاکستان نے95 رن سے جیت حاصل کی تھی۔
