کولکاتہ (یو این آئی) مغربی بنگال میں بدھ کو بھارتیہ جنتا پارٹی (بی جے پی) کی طرف سے 12 گھنٹے کے بند کی کال کے دوران بی جے پی اور حکمراں ترنمول کانگریس (ٹی ایم سی) کے کارکنوں کے درمیان کئی مقامات پر جھڑپیں ہوئیں اور بند کی وجہ سے نظام زندگی جزوی طور پر متاثر ہوا۔ بند کے دوران پرائیویٹ گاڑیاں اور ٹیکسیاں سڑکوں سے غائب رہیں، نجی دفاتر اور تعلیمی اداروں میں حاضری کم درج کی گئی اور کئی بازار اور کاروباری ادارے بند رہے ۔ ریاست کے کچھ حصوں میں ٹرین خدمات بھی متاثر ہوئیں۔ صبح 6 بجے سے مختلف اضلاع سے بی جے پی اور ترنمول کانگریس کے حامیوں کے درمیان جھڑپوں کی خبریں آتی رہیں، جب کہ کلکتہ ہائی کورٹ نے بنگال بند کے خلاف درخواست کو مسترد کر دیا۔ کولکاتہ کے منشی بازار اور نادیہ اضلاع اور دیگر علاقوں میں جھڑپیں ہوئیں۔ ریاست بھر میں بی جے پی کے کئی لیڈروں کو حراست میں لیا گیا، جب کہ نارتھ 24 پرگنا کے بی جے پی لیڈر پریانگو پانڈے نے دعویٰ کیا کہ ترنمول کانگریس کے حامیوں نے ان کی کار پر فائرنگ کی اور بم سے حملہ کیا۔بند کے موقع پر ممتا بنرجی حکومت کی طرف سے دی گئی وارننگ کی وجہ سے زیادہ تر سرکاری ملازمین نے معمول کے مطابق ڈیوٹی پر آئے ۔ نارتھ بنگال اسٹیٹ ٹرانسپورٹ کارپوریشن (این بی ایس ٹی سی) نے اپنے بس ڈرائیوروں کو حفاظت کے لیے ہیلمٹ پہننے کا مشورہ دیا ہے ۔بند کی کامیابی پر حریفوں کے جوابی دعووں کے درمیان، ٹی ایم سی لیڈر ابھیشیک بنرجی نے کہا کہ بی جے پی کا بند فلاپ رہا۔انہوں نے سندیشکھلی معاملے کو سیاسی رنگ دینے کی بی جے پی کی ناکام کوششوں کو نشانہ بناتے ہوئے کہا، "مغربی بنگال کو بی جے پی سے کچھ سیکھنے کی ضرورت نہیں ہے ۔ یہ معاملہ بی جے پی نے شروع کیا ہے ، لیکن میں اسے ختم کروں گا اورتحریک کو دہلی تک لے جاؤں گا۔ان کی پارٹی کے ساتھی کنال گھوش نے الزام لگایا کہ لوگ بند میں شرکت کے لیے تیار نہیں تھے ۔ ایک اور ٹی ایم سی لیڈر نے الزام لگایا کہ بھگوا پارٹی کے کارکنوں نے کچھ تعلیمی اداروں کو زبردستی بند کرنے کی کوشش کی۔مسٹر گھوش نے کہا، ‘‘بی جے پی انتشار پھیلانے کی کوشش کر رہی ہے ، لیکن ریاست کے بیشتر حصوں میں حالات معمول پر ہیں۔وزیر اعلیٰ ممتا بنرجی نے ایکس پر ایک پوسٹ میں ترنمول چھاتر پریشد کے یوم تاسیس کو آرجی کر میڈیکل کالج اوراسپتال اور اس ٹرینی ڈاکٹر کو وقف کیا جو 9 اگست کو حیوانیت کی بھینٹ چڑھ گئی۔محترمہ بنرجی نے طلباء سے خطاب کرتے ہوئے مرکزی حکومت کو مغرور قرار دیا اور بی جے پی کے بند کی مخالفت کرتے ہوئے اس کے پیچھے کی وجہ اور مقصد پر سوال اٹھایا۔ انہوں نے بی جے پی کو جھوٹ بولنے کی عادت والی جماعت بھی قرار دیا اور ٹرینی ڈاکٹر کے قتل کے مجرموں کو سخت سزا دینے کا مطالبہ کیا۔ انہوں نے کہا، "اگر مجھے اختیار اور طاقت ملی تو میں اس بات کو یقینی بناؤں گی کہ مجرموں کو ایک ہفتے کے اندر سزا ملے ۔ترنمول طلباء ونگ کے اراکین کی جانب سے پریشد کے یوم تاسیس کے موقع پر سینٹرل کولکاتہ کے میئو روڈ پر مارچ نکالنے کے فوراً بعد انہوں نے کہا ‘‘سب سے پہلے وزیر اعظم نریندر مودی کے خلاف ایک بند کا انعقاد کیا جانا چاہئے کیونکہ انہوں نے منی پور کے واقعات پر استعفی نہیں دیا ہے ۔متوازی احتجاج میں آر جی کر میڈیکل کالج اور اسپتال سمیت کئی میڈیکل کالجوں کے مظاہرین جونیئر ڈاکٹروں نے شہر کے پولیس سربراہ ونیت گوئل کو برخاست کرنے اور کام کی جگہ کو محفوظ بنانے کا مطالبہ کیا۔کئی اضلاع میں صبح سے ہی بی جے پی کے حامی سڑکوں پر لوگوں سے اپنے ادارے بند کرنے کی اپیل کرتے نظر آئے ۔ کچھ ٹی ایم سی کارکنوں نے بند کے خلاف احتجاج کرنے کی کوشش کی جبکہ دونوں فریقوں کے درمیان معمولی جھڑپیں ہوئیں۔کولکاتہ میں ایک 31 سالہ ٹرینی ڈاکٹر کی عصمت دری اور قتل کے سلسلے میں منگل کو ریاستی سکریٹریٹ ‘نبانہ ابھیان ریلی میں حصہ لینے والوں کی پولیس کارروائی اور حراست کے خلاف بند کی کال دی گئی ہے ۔ بی جے پی نے گورنر سی وی آنند بوس کو ایک خط لکھ کر منگل کو احتجاجی مظاہرے کے دوران حراست میں لیے گئے اور گرفتار کیے گئے طلباء کو رہا کرنے کا پول۔یس کو ہدایت دینے کی درخواست کی۔ پولیس نے آج عوامی زندگی میں خلل ڈالنے کے الزام میں ریاست بھر میں بی جے پی کے کئی لیڈروں اور ان کے حامیوں کو حراست میں لے لیا۔بی جے پی لیڈر روپا گنگولی کو کولکاتہ کے گریہاٹ میں اس وقت حراست میں لیا گیا جب انہوں نے مسافروں سے بنگال بند میں شامل ہونے کی اپیل کی۔
