نئی دہلی (اے یوایس)آر ایس ایس کے سربراہ موہن بھاگوت اب وزیر اعظم نریندر مودی اور وزیر داخلہ امت شاہ کی طرح اعلی درجے کی حفاظت میں ہوں گے۔ ان کے زیڈ پلس سیکیورٹی کور کو ایڈوانس سیکیورٹی لیزن (اے ایس ایل) تک بڑھا دیا گیا ہے۔ ایسے میں ان کی حفاظت کے لیے مزید سیکیورٹی اہلکار تعینات کیے جائیں گے۔ ان کا حفاظتی حصار پہلے سے زیادہ مضبوط ہوگا۔ یہ فیصلہ وزارت داخلہ کی جانب سے حال ہی میں منعقدہ اجلاس کے بعد لیا گیا ہے۔ میٹنگ میں یہ بات سامنے آئی کہ غیر بی جے پی حکومت والی ریاستوں میں موہن بھاگوت کی سیکورٹی کے دوران سستی برتی گئی ہے۔ ایسے میں ممکنہ خطرے کے پیش نظر سیکورٹی بڑھانے کا فیصلہ کیا گیا ہے۔ اس وقت سی آئی ایس ایف کے سپاہی اور افسران موہن بھاگوت کی حفاظت میں لگے ہوئے تھے۔ جانکاری کے مطابق تمام ریاستوں اور مرکز کے زیر انتظام علاقوں کو اس بارے میں مطلع کر دیا گیا ہے۔ موہن بھاگوت اب کثیر سطحی حفاظتی احاطہ میں رہیں گے۔ یہی نہیں، ہیلی کاپٹر کے سفر کی اجازت صرف خصوصی طور پر بنائے گئے ہیلی کاپٹروں میں ہوگی۔ایس پی جی کو ہندوستان میں سب سے محفوظ پارٹی سمجھا جاتا ہے۔ یہ صرف وزیراعظم کو تحفظ فراہم کرتا ہے۔
