پیرس (یو این آئی) پریتی پال نے جمعہ کو پیرس پیرا اولمپک 2024 گیمز میں شاندار کارکردگی کا مظاہرہ کرتے ہوئے خواتین کی 100 میٹر دوڑ میں کانسے کا تمغہ جیتا۔ آج کے مقابلے میں سخت مقابلے کے باوجود پریتی نے اپنی بہترین کارکردگی پیش کی اور 14.21 سیکنڈ میں 100 میٹر کی دوڑ مکمل کرکے کانسے کا تمغہ جیتا۔ نیشنل پیرا ایتھلیٹکس چمپئن شپ (2024) گولڈ میڈلسٹ پریتی پال نے ہندوستان کے لیے تیسرا تمغہ جیتا ہے۔ پریتی پہلی بار پیرالمپکس میں حصہ لے رہی تھیں۔ پیرا اولمپکس میں یہ ان کا پہلا تمغہ ہے۔ میڈیا سے بات کرتے ہوئے پریتی نے کہاکہ میں یقین نہیں کر سکتی کہ میں نے ملک کے لیے تمغہ جیتا ہے۔ انہوں نے کہا کہ یہ میرا پہلا پیرا اولمپکس تھا اور یہ میرا پہلا تمغہ ہے۔ انہوں نے اپنے خاندان، ساتھیوں اور رشتہ داروں کی حمایت اور تعاون کا شکریہ ادا کیا۔
