سعودی عرب:سعودی عرب میں اقتصادی اور ترقیاتی امور کی کونسل نے وڈیو کانفرنس کے ذریعے اسٹریٹجک مینجمنٹ بیورو کی جانب سے پیش کی گئی ایک رپورٹ کا جائزہ لیا۔ یہ رپورٹ 2024 کی پہلی سہ ماہی کے لیے مملکت کے ‘ویژن 2030’ سے متعلق پروگراموں کی رپورٹ پر مبنی تھی۔ اس دوران میں پروگراموں کے تزویراتی اہداف اور کارکردگی کے جائزے کے علاوہ رواں سال میں جاری کوششوں اور مستقبل کی توقعات کو زیر بحث لایا گیا۔ اس موقع پر واضح کیا گیا کہ سال 2024 کا آغاز تینوں ویژن (متحرک معاشرہ، خوش حال معیشت، بلند پرواز وطن) کی تمام جہتوں میں نمایاں پیش رفت کے ساتھ ہوا۔
اجلاس میں کونسل نے ایجنڈے میں شامل متعدد رپورٹوں اور موضوعات کا جائزہ لیا۔ ان میں وزارت اقتصادیات و منصوبہ بندی کی جانب سے سال 2024 کی دوسری سہ ماہی کے لیے اقتصادی رپورٹ کا جائزہ شامل ہے۔ جائزے میں عالمی معیشت اور مالیاتی بازاروں کے علاوہ قومی معیشت کی پیش رفت اور اس کے نمایاں ترین اشاریوں کا تجزیہ کیا گیا ہے۔اجلاس میں 2023 کے لیے پبلک انویسٹمنٹ فنڈ کی سالانہ رپورٹ، 2023 کے لیے ٹریفک سیفٹی کی سالانہ رپورٹ، سوشل سپورٹ اور اسسٹینس سسٹم سے متعلق وزارتی کمیٹی کی شش ماہی رپورٹ اور 2024 کی دوسری سہ ماہی کے لیے پرائس کنٹرول کمیٹی کی رپورٹ کا بھی جائزہ لیا گیا۔کونسل نے ان امور کے حوالے سے ضروری فیصلے اور سفارشات بھی جاری کیں۔
