گریٹر نوئیڈا (یو این آئی) نیوزی لینڈ کرکٹ ٹیم کے کوچ گیری اسٹیڈ نے کہا کہ بغیر کوئی گیند پھینکے افغانستان کے ساتھ ٹیسٹ میچ منسوخ ہونے کی وجہ سے ہم نے ایشیائی دورے کی تیاری کا ایک بہترین موقع گنوا دیا ہے اور اس سے کھلاڑیوں اور پورے کوچنگ اسٹاف میں مایوسی ہے۔
اسٹیڈ نے کہا، “ہمیں ابھی سری لنکا کے خلاف دو ورلڈ ٹیسٹ چیمپئن شپ (ڈبلیو ٹی سی) میچ کھیلنے ہیں، جو ہماری تیاریوں کے لیے ایک اچھا میچ ہو سکتا ہے۔ ہمارے لیے سب سے مایوس کن بات یہ ہے کہ ہم نے تیاری کا موقع گنوا دیا۔ حالانکہ یہ ورلڈ ٹیسٹ چیمپئن شپ کا میچ نہیں تھا لیکن ہمارے کھلاڑیوں نے پانچ دن تک ٹیسٹ کرکٹ کھیلنے کا موقع گنوا دیا۔ اگر یہ میچ ہوتا تو ہم بہترین کرکٹ دیکھ سکتے تھے۔
انہوں نے کہا کہ افغانستان کے ساتھ یہ ہمارا پہلا ٹیسٹ میچ تھا اور ہم یقینی طور پر پرجوش تھے۔ انہوں نے گزشتہ چند ورلڈ کپ کے دوران ہمیں اچھا مقابلہ دیا اور ہم ان کے ساتھ ٹیسٹ میچ بھی کھیلنا چاہتے تھے۔ ان کے پاس کچھ اچھے اور منفرد گیندباز ہیں، ان کا سامنا کرنا ہمارے لیے فائدہ مند ثابت ہو سکتا تھا۔ ایسے حالات میں کھیلنا آپ کو ہمیشہ کچھ نیا سکھاتا ہے لیکن یہ بدقسمتی ہے کہ ہمیں وہ موقع نہیں ملا۔
انہوں نے کہاگزشتہ ایک ہفتے میں یہاں 1200 ملی میٹر سے زیادہ بارش ہوئی ہے۔ اگرچہ ٹیسٹ کے پہلے دو دن موسم ٹھیک تھا لیکن شام کو طوفان بھی آیا۔ جس کی وجہ سے گراؤنڈ زیادہ گیلا تھا اور امپائرز کو لگا کہ یہاں میچ نہیں ہو سکتا۔ یہ کھلاڑیوں کے بس میں نہیں تھا اور کھلاڑی بھی اس سے کافی مایوس تھے۔ وہ ٹیسٹ میچ کھیلنے آئے تھے اور انہیں ٹیسٹ میچ بہت پسند بھی ہے۔
انہوں نے کہا کہ میں مستقبل کے دوروں اور ٹورنامنٹ کے بارے میں کوئی فیصلہ نہیں کرتا لیکن اس دورے پر آنے سے پہلے ہی میں نے کہا تھا کہ افغانستان اب دنیا کے بڑے ممالک کو شکست دینے کی صلاحیت رکھتا ہے۔ وہ کرکٹ کی قوت کے طور پر ابھر رہے ہیں اور میں ان کے ساتھ کسی بھی وقت ٹیسٹ کرکٹ کھیلنا پسند کروں گا۔ تاہم مستقبل کے دورے کے پروگراموں کا فیصلہ کرنا میرے ہاتھ میں نہیں ہے اور یہ دونوں ممالک کے بورڈز کا باہمی معاملہ ہے۔
