ممبئی (یو این آئی) اے ایف سی چیمپئنز لیگ 2 میں ہندوستانی فٹ بال کلب موہن باغان سپر جائنٹس اور تاجکستان کے فٹ بال کلب راوشن کلوب کے درمیان کھیلا گیا میچ بغیر کسی گول کے برابری پر ختم ہوا۔
بدھ کی رات یہاں وویکانند یووا بھارتی کریڑاگن میں اے ایف سی چیمپئنز لیگ 2 کے گروپ اے میں موہن باغان اور راوشن کلوب کے درمیان کھیلا گیا سنسنی خیز مقابلہ بغیر کسی گول کے ڈرا پر ختم ہوا۔میچ کے دوران دونوں ٹیموں کو گول کرنے کے مواقع ملے لیکن وہ ان سے فائدہ اٹھانے میں ناکام رہیں۔ موہن باغان نے شاندار آغاز کرتے ہوئے کلوب ٹیم پر دباؤ بنایا اور انہیں دفاعی انداز میں کھیلنے پر مجبور کیا۔ 19 ویں منٹ میں دیمتری پیٹراٹوس نے گول کرنے کی زبردست کوشش کی لیکن کلوب کی ڈیفنس لائن نے اسے روک دیا۔28 ویں منٹ میں کلوب کے کوجو میٹک نے باغان کے ڈیفنس کے اوپر سے گیند نکالی جس پر محمدجون رحیموف نے شاٹ لگایا لیکن باغان کے الرٹ گول کیپر وشال کیتھ نے رحیموف کی کوشش کو ناکام بنا دیا۔ باغان کے آشیش رائے کو 29ویں منٹ میں پیلا کارڈ دکھایا گیا۔ اس کے بعد 76ویں اور 88ویں منٹ میں گول کے مواقع بنے۔
آخر میں میچ بغیر کسی گول کے ڈرا رہنے پر دونوں ٹیموں کے درمیان پوائنٹس تقسیم ہو گئے۔
