کانپور (یو این آئی) یشسوی جیسوال (72) اور شبھمن گل (ناٹ آؤٹ 37) رنوں کی شاندار اننگز کی بدولت ہندوستان نے دوسرے ٹیسٹ میچ کے چوتھے دن پہلی اننگ میں 285رن 9وکٹوں پر ڈکلیئر کردیا ۔ بنگلہ دیش دوسری اننگ میں دووکٹوں کےنقصان پر 26رن بنا لئے تھے۔ بنگلہ دیش کی جانب سے صدام اسلام 7رن بناکر کھیل رہے ہیں ۔
بنگلہ دیش کو پہلی اننگ میں 233 رنز پر آؤٹ کرنے کے بعد بلے بازی کے لئے آئے یشسوی جیسوال اور کپتان روہت شرما نے جارحانہ انداز میں بلے بازی کرتے ہوئے پہلے وکٹ کے لئے 3.5 اوورز میں 55 رنز جوڑے۔ مہدی حسن میراز نے چوتھے اوور میں روہت شرما کو بولڈ آؤٹ کیا۔ روہت نے 11 گیندوں میں تین چھکے اور ایک چوکا لگا کر 23 رنز بنائے۔ 15ویں اوور میں حسن محمود نے سنچری کی طرف بڑھ رہے جیسوال کو بولڈ کر کے ہندوستان کو بڑا جھٹکا دیا۔ جیسوال نے 51 گیندوں میں دو چھکوں اور 12 چوکوں کی مدد سے 72 رنوں کی اننگ کھیلی۔ چائے کے وقت تک ہندوستان نے دو وکٹوں پر 138 رنز بنا لیے تھے اور شبھمن گل 37 اور رشبھ پنت چار رنز کے ساتھ کریز پر موجود تھے۔
اس سے قبل جسپریت بمراہ اور دیگر گیند بازوں نے بارش سے متاثرہ دوسرے ٹیسٹ میچ کے چوتھے دن بنگلہ دیش کی پہلی اننگ 233 کے اسکور پر سمیٹ دی تھی۔
تقریباً ڈھائی دن بارش اور آؤٹ فیلڈ گیلا ہونے کی وجہ سے بنگلہ دیش نے آج صبح تین وکٹ پر 107 رن کے اسکور سے آگے کھیلنا شروع کیا۔ ابھی ٹیم کا اسکور 112 رنز ہوا تھا کہ جسپریت بمراہ نے مشفق الرحیم (11) کو بولڈ کرکے پویلین بھیج دیا۔ اس کے بعد محمد سراج نے لٹن کمار داس (13) کو روہت شرما کے ہاتھوں کیچ آؤٹ کروا کر بنگلہ دیش کو پانچواں جھٹکا دیا۔ شکیب الحسن (9) کو اشون نے آؤٹ کیا۔ لنچ کے وقت تک بنگلہ دیش نے چھ وکٹوں پر 210 رنز بنا لیے تھے۔
لنچ کے بعد بنگلہ دیش کا ساتواں وکٹ مہدی حسن میراز کی صورت میں گری۔ پیر جمانے کی کوشش کرنے والے مہدی حسن میراز (20) کو بمراہ نے گل کے ہاتھوں کیچ آؤٹ کرایا۔ اس کے بعد تیج الاسلام (5) کو بمراہ نے بولڈ کردیا۔ حسن محمود (1) کو محمد سراج نے ایل بی ڈبلیو کیا۔ رویندرا جڈیجہ نے خالد احمد (0) کو اپنی ہی گیند پر کیچ آؤٹ کرکے بنگلہ دیش کی اننگ سمیٹ دی۔ مومن الحق (107 ناٹ آؤٹ) رہے۔ بنگلہ دیش کی پہلی اننگ 74.2 اوورز میں 233 رنز پر ختم ہوگئی۔
اس سے قبل کھانے کے وقفے تک بنگلہ دیش نے 67 اوورز میں چھ وکٹوں کے نقصان پر 210 رنز بنائے تھے۔ مومن الحق 106 اور مہدی چھ رنز کے ساتھ کھیل رہے تھے۔
ہندوستان کی جانب سے جسپریت بمراہ نے 50 رن دے کرتین وکٹیں حاصل کیں۔ محمد سراج، روی چندرن اشون اور آکاش دیپ نے دو دو وکٹ لئے۔ رویندر جڈیجہ نے ایک بلے باز کو آؤٹ کیا۔
