غزہ (یو این آئی) حماس کے عسکری ونگ القسم بریگیڈز نے شمالی غزہ شہر میں ایک حملے میں متعدد اسرائیلی فوجیوں کو ہلاک اور زخمی کرنے کا دعوی کیا ہے۔القسم بریگیڈز کے ایک پریس بیان کے مطابق، اس کے ارکان نے 10 اسرائیلی فوجیوں کے ایک گروپ کو اینٹی پرسنل بم سے کامیابی سے نشانہ بنایا، جس کے نتیجے میں علاقے میں کافی فوجی جانی نقصان ہوا۔
بیان میں یہ بھی کہا گیا کہ بریگیڈ نے ایک ہیلی کاپٹر کو انخلاء کے لیے اترتے ہوئے دیکھا، لیکن اس نے واقعے کے بارے میں مزید تفصیلات فراہم نہیں کیں۔
بریگیڈ نے دعویٰ کیا کہ انہوں نے غزہ شہر کے شمال میں واقع علاقے توام میں یاسین 105 میزائل سے اسرائیلی بکتر بند عملہ بردار کو نشانہ بنایا۔ اسرائیلی فوج نے فوری طور پر ان واقعات پر کوئی تبصرہ نہیں کیا۔
سرکاری اسرائیلی ریڈیو نے اطلاع دی ہے کہ شمالی غزہ میں فورسز کو اہم سیکورٹی چیلنجز کا سامنا ہے اور زخمی فوجیوں کو نکالنے کے لیے ہیلی کاپٹروں کو تعینات کیا گیا ہے۔
القسم بریگیڈز نے یہ بھی کہا کہ انہوں نے 114 ملی میٹر کیلیبر والے متعدد مختصر فاصلے تک مار کرنے والے میزائلوں کا استعمال کرکے رفح شہر کے مشرق میں فوجی اجتماعات اور آپریشنل مراکز کے ساتھ ساتھ جنوبی اسرائیل میں اسڈروٹ کے علاقے کو بھی نشانہ بنایا۔ ان میزائل لانچوں سے کسی جانی یا مالی نقصان کی اطلاع نہیں ہے۔
قبل ازیں پیر کو القسم بریگیڈز نے غزہ پٹی میں اسرائیل کے خلاف طویل لڑائی کے لیے اپنی تیاری کا اعلان کیا تھا۔
القسم بریگیڈز کے ترجمان ابو عبیدہ نے 7 اکتوبر کو اسرائیل پر حماس کے حملے کی پہلی برسی کے موقع پر ایک ویڈیو بیان میں کہا ’’ہم نے اسرائیل کے خلاف اس طویل جنگ کو جاری رکھنے کا فیصلہ کیا ہے۔‘‘
