بلال بزاز
سرینگر ،سماج نیوز سروس:صدفیصد ی میٹرنگ کے بعد جموں کشمیر کے عوام کو 24گھنٹے بنا خلل کے بجلی ملے گی کی بات کرتے ہوئے وزیر اعلیٰ عمر عبد اللہ نے کہا کہ لوگوں کے تمام مسائل کو حل کرنے کیلئے انتظامیہ دن رات محنت کر رہی ہے ۔ تفصیلات کے مطابق اپنی سرکار ی رہائشگا ہ کے باہر میڈیا نمائندوں سے بات کرتے ہوئے وزیر اعلیٰ عمر عبد اللہ نے کہا کہ 100 فیصد میٹرنگ کے بعد جموں و کشمیر کو 24گھنٹے بنا کسی خلل کے بجلی ملے گی۔ انہوں نے کہا کہ غیر طے شدہ بجلی کی کٹوتی کے مسئلے کو حل کرتے ہوئے، ضرورت سے زیادہ اور غیر مجاز بجلی کے استعمال کی وجہ سے نظام پر نمایاں دباؤ کو تسلیم کیا۔انہوں نے کہا ’’ایسے لوگ ہیں جن کے پاس چار بلب کیلئے بجلی استعمال کرنے کا معاہدہ ہے لیکن وہ چار ہیٹر کے برابر بجلی استعمال کرتے ہیں۔ اس سے سسٹم پر بہت زیادہ دباؤ پڑتا ہے‘‘۔ انہوں نے بتایا کہ لوگوں سے بجلی کی کھپت کو ہموار کرنے میں حکام کے ساتھ تعاون کرنے کی اپیل کی۔عمر عبد اللہ نے کہا کہ سخت سردی نے علاقے کی پریشانیوں میں اضافہ کر دیا ہے، پانی کے جمے ہوئے پائپوں نے آبادی کو درپیش مشکلات کو مزید بڑھا دیا ہے۔ انہوں نے برف باری کی امید ظاہر کی جس سے موسمی حالات بہتر ہوں گے اور کچھ چیلنجز کم ہوں گے۔انہوں نے کہا ’’ہم تمام مسائل کو حل کرنے کیلئے سخت محنت کر رہے ہیں، لیکن کچھ مسائل اس وقت تک برقرار رہیں گے جب تک کہ ریاست کا درجہ بحال نہیں ہو جاتاہے ۔‘‘
