حاجی پور، 24 فروری (نمائندہ): ویشالی ضلع کے مشہور و معروف دانشور اور سیاسی و سماجی خدمت گزار ابوبکر صدیقی نے آج بہار کے ہر دل عزیز وزیراعلی نتیش کمار کو خط لکھ کر بہار اسٹیٹ مدرسہ ایجوکیشن بورڈ میں مستقل چیئرمین کی بحالی کرنے اور دفتر میں کام کرنے والے ملازموں کی بحالی کرنے کا مطالبہ کیا ہے۔ انہوں نے اپنے خط کے ذریعے سے وزیراعلی نتیش کمار کو یہ بتایا ہے کہ بہار اسٹیٹ مدرسہ ایجوکیشن بورڈ اقلیتی طلبہ کی تعلیم و تربیت کا ایک اہم ادارہ ہے، اور اس کی مؤثر نگرانی کے لیے ایک مستقل چیئرمین کا ہونا ضروری ہے۔ چیئرمین کی غیر موجودگی میں تعلیمی پالیسیوں پر عمل درآمد میں تاخیر ہو رہی ہے، جس کی وجہ سے مدارس کے اساتذہ اور طلبہ کو مختلف مشکلات کا سامنا کرنا پڑ رہا ہے۔اس لیے بہار کے ہر دل عزیز وزیراعلی نتیش کمار سے درخواست کیا ہے کہ جلد از جلد بہار اسٹیٹ مدرسہ ایجوکیشن بورڈ میں ایک مستقل چیئرمین کی تقرری عمل میں لائی جائے اور صدر دفتر میں خالی عہدوں پر کام کرنے والے ملازموں کی تقرری کی جائے۔ تاکہ اقلیتی طبقے کی تعلیمی ترقی کو یقینی بنایا جا سکے ۔ کیونکہ مدرسہ بورڈ کی بہتری اور اس کے بہتر نظم و نسق کے لیے ایک اہل، تجربہ کار اور ایماندار چیئرمین کی فوری تقرری نہایت ضروری ہے۔ مزید انہوں نے اپنے خط میں کہا ہے کہ وزیر اعلی نتیش کمار کی قیادت میں ریاست نے کئی تعلیمی اصلاحات دیکھی ہیں، اور ہمیں یقین ہے کہ نتیش کمار مدرسہ تعلیمی نظام کو مزید مستحکم بنانے کے لیے اس مسئلے پر فوری توجہ دیں گے۔آخر میں ابوبکر صدیقی نے کہا ہے کہ ہمیں یقین ہے نہیں پوری امید ہے کہ نتیش کمار اس حساس معاملے میں جلد از جلد مناسب اقدام کریں گے۔ اور مدارس کے جتنے بھی مسائل ہیں خواہ 1646 مدرسوں کی منظوری کا معاملہ ہو یا مدارس اسلامیہ میں اساتذہ کے تقرری کا مسئلہ ہو یا تنخواہ کی ادائیگی کا مسئلہ ہو یا پھر امتحانات کے مسائل ہوں یا پھر کسی اور طرح کے مسائل ہوں وہ مسلمانوں کے سبھی معاملات میں دلچسپی سے کام کرتے ہیں۔ اور کرتے رہینگے۔ ساتھ ہی ہمیں اعتماد ہے کہ وہ اپنے افسران کو حکم دے کر ان تمام معاملات کا حل بہت جلد کروائیں گے۔
