جے ڈی یو کی ورکنگ میٹنگ میں پارٹی کو مضبوط بنانے پر زور دیا گیا

بہارشریف(محمد راشد دسنوی) نالندہ ضلع ہیڈکوارٹر بہارشریف میں واقع آئی ایم اے ہال میں جے ڈی (یو) کی ضلعی ایگزیکٹو کی ایک اہم میٹنگ منعقد ہوئی۔جے ڈی (یو) کے سرکردہ لیڈروں نے میٹنگ میں شرکت کی،جس میں بہار اسمبلی انتخابات کی حکمت عملی پر توجہ مرکوز کی گئی تھی اور پارٹی کو نچلی سطح پر مضبوط کرنے کے ایکشن پلان پر بڑے پیمانے پر غور و خوض کیا گیا تھا۔میٹنگ کی صدارت کرتے ہوئے جے ڈی (یو) کے ضلع صدر محمد ارشد نے اہم ایجنڈے پر تبادلہ خیال کیا۔انہوں نے کہا کہ ضلعی تنظیم انچارج تمام ضلعی عہدیداروں اور ایگزیکٹو ممبران کو تین پنچایتیں الاٹ کریں گے۔ ان الاٹ شدہ پنچایتوں میں 15 مارچ 2025 تک پنچایت کمیٹی تشکیل دینا اور بوتھس پر سماجی مساوات پر تحریری رپورٹ تیار کرنا لازمی قرار دیا گیا ہے۔اسمبلی انچارجوں اور بلاک صدور کے ساتھ مل کر اس کام کو فوری طور پر مکمل کرنے کی ہدایت دی گئی۔میٹنگ میں رکن پارلیمنٹ کوشلندر کمار نے وزیر اعلیٰ نتیش کمار کے جامع ترقیاتی ماڈل کا ذکر کرتے ہوئے کہاکہ نتیش جی نے تمام طبقات اور مذاہب کے لوگوں کی ترقی کے لیے بے مثال کام کیا ہے۔ضلع کی تمام نشستوں پر کامیابی کو یقینی بنانے کے لیے ہمیں ابھی سے کمر بستہ ہونا پڑے گا۔ہمارے کارکن ہمارا اصل سرمایہ ہیں، اس لیے انہیں حکومت کی کامیابیاں بتانے کے لیے ہر گاؤں اور بوتھ پر جانا پڑے گا۔سابق ایم ایل سی راجو یادو نے تنظیمی طاقت پر زور دیتے ہوئے کہاکہ ایک مضبوط تنظیم ہماری کامیابی کی کلید ہے ضلع تنظیم کے انچارج لالن مہتو نے کہاکہ بہار میں وزیر اعلیٰ نتیش کمار کی قیادت میں سماج کے ہر طبقے کی ترقی کے لیے بہت سی پالیسیوں اور اسکیموں کے کامیاب نفاذ کے ذریعے کئی ریکارڈ بنائے جا رہے ہیں۔آپسی تال میل سے ہر پنچایت اور جے ڈی (یو) نے آنے والے اسمبلی انتخابات میں پوری طاقت کے ساتھ مقابلہ کرنے کی تیاری شروع کردی ہے۔اس موقع پر سابق ایم ایل اے چندرسین پرساد،ضلع تنظیم انچارج لالن مہتو،اصغر شمیم،جے ڈی یو ضلع ترجمان بھوانی سنگھ،سنجے پاسوان،سابق صدر بنارس پرساد کے علاوہ تمام عہدیداران بھی موجود تھے اور سبھی بلاک صدور نے شرکت کی۔