واشنگٹن(ہ س)۔امریکہ نے یمن میں حوثیوں کے ٹھکانوں پر نئے فضائی حملے کیے ہیں۔ العربیہ نیوز کے ذرائع کے مطابق ان حملوں میں صنعاء ، مارب، الحدیدہ اور حجہ میں حوثیوں کو نشانہ بنایا گیا۔ذرائع کا یہ بھی کہنا ہے کہ امریکی حملوں میں الحدیدہ کے جزیرہ کمران میں حوثیوں کے ہتھیاروں کے گوداموں کو تباہ کر دیا گیا۔ اسی طرح مارب کے علاقے الجوبہ میں بھی حوثیوں کے گولہ بارود کے ڈپو کو نشانہ بنایا گیا۔ذرائع کے مطابق صنعاء میں بنی حشیش میں الجمیمہ عسکری کیمپ پر پانچ فضائی حملے ہوئے۔ادھر حوثی ملیشیا کے اعلان کے مطابق امریکی حملے میں ملیشیا کی انٹیلی جنس کا ایک افسر کرنل عبدالناصر سرحان الکمالی ہلاک ہو گیا۔ذرائع نے بتایا ہے کہ تہران نواز حوثی ملیشیا نے صنعاء میں حوثی کمانڈروں کے گھروں پر امریکی بم باری کے بعد علاقے میں گرفتاری کی مہم انجام دی۔اس دوران حوثی انٹیلی جنس کے سربراہ کے نائب کو جغرافیائی معلومات افشا کرنے کے الزام میں گرفتار کر لیا گیا۔اس سے قبل صنعاء میں مقامی آبادی نے بتایا تھا کہ گرفتاری کی مہم میں اس علاقے میں درجنوں گھروں پر چھاپے مارے گئے جہاں امریکی طیاروں نے بم باری کی تھی۔ حوثیوں نے بیرون کے ذرائع کو مخبری کے شبہے میں متعدد افراد کو گرفتار کر لیا۔یہ ہی وہ حیلہ ہے جس کے ذریعے حوثیوں نے گذشتہ برس کے وسط سے اب تک اقوام متحدہ کی امدادی ایجنسیوں اور دیگر انسانی تنظیموں اور مشنوں کے درجنوں اہل کاروں اور کارکنان کو اغوا کیا۔ حوثی ان افراد کو رہا کرنے سے انکار کرتے ہیں۔یاد رہے کہ گذشتہ ماہ 15 مارچ سے امریکا یمن میں حوثیوں کے خلاف بھرپور فضائی حملے کر رہا ہے۔ حملوں میں حوثیوں کے ٹھکانوں، ہتھیاروں کے گوداموں اور کمانڈروں کو نشانہ بنایا گیا۔امریکی صدر ڈونلڈ ٹرمپ حوثیوں کو ختم کرنے کا عزم رکھتے ہیں۔ وہ ایران کو خبردار کر چکے ہیں کہ وہ حوثیوں کو مسلسل سپورٹ پیش کرنے سے باز رہے۔
