پٹنہ، 28 مئی (یواین آئی) بہار کے وزیر اعلیٰ نتیش کمار نے آج افسران کو چھ لین شیر پور۔دیگھوارہ گنگا پل کے تعمیراتی کاموں کو تیزی سے مکمل کرنے کی ہدایت دی ۔ مسٹر کمار نے بدھ کو چھ لین شیرپور۔دیگھوارہ گنگا پل کا معائنہ کرتے ہوئے عہدیداروں کو ہدایت دی کہ وہ شیرپور اور دیگھوارہ کے درمیان بنائے جارہے اس چھ لین گنگا پل کے تعمیراتی کام کو تیزی سے مکمل کریں۔ اس پل کے نیچے سے پٹنہ کی طرف جے پی گنگاپتھ بھی بنایا جا رہا ہے۔یہ پل بہٹا سرمیرا پتھ سے بھی جڑے گا۔
وزیر اعلیٰ نے کہا کہ اس پل کی تعمیر مکمل ہونے کے بعد شمالی اور جنوبی بہار کے درمیان رابطہ آسان ہو جائے گا۔ اس کے ساتھ پٹنہ کے مغربی کنارے کے لوگوں کو ایک جگہ سے دوسری جگہ جانے میں بھی سہولت ملے گی۔ انہوں نے کہا کہ پٹنہ رنگ روڈ کا حصہ ہونے کی وجہ سے لوگوں کو دارالحکومت کی چاروں سمتوں میں سفر کرنا آسان ہو جائے گا۔معائنہ کے دوران افسران نے مسٹر کمار کو بتایا کہ نیشنل ہائی ویز اتھارٹی آف انڈیا (این ایچ آئی) کے ذریعہ گنگا ندی پر 3200 کروڑ روپے کی لاگت سے چھ لین گنگا پل تعمیر کیا جا رہا ہے۔ یہ پل پٹنہ ضلع کے شیرپور سے سارن ضلع کے دیگھوارہ تک جاتا ہے۔ اس پل کی لمبائی 14.52 کلومیٹر ہے۔ یہ پل پٹنہ شہرکے رنگ روڈ کے طور پر بھی کام کرے گا۔ پل کی تعمیر کا کام سال 2027 تک مکمل ہونے کا امکان ہے۔
معائنہ کے دوران وزیراعلیٰ کے پرنسپل سکریٹری دیپک کمار، وزیراعلیٰ کے سکریٹری انوپم کمار، روڈ کنسٹرکشن ڈپارٹمنٹ کے سکریٹری سندیپ کمار آر پدوکلکٹی، محکمہ روڈ کنسٹرکشن کے سکریٹری بی کارتیکیہ دھنجی، وزیراعلیٰ کے اسپیشل آفیسر گوپال سنگھ، پٹنہ کے ضلع مجسٹریٹ ڈاکٹر چندر شیکھر سنگھ، سنیئرپولیس سپرنٹنڈنٹ اوکاش کمار ، این ایچ اے کے سینئر افسران اور انجینئر موجود تھے۔
