تل ابیب، ایجنسی: ایرانی حملوں سے اسرائیلی شہر تل ابیب اور بیت یام کھنڈر بن گئے ہیں، جگہ جگہ عمارتیں ملبے کا ڈھیر بن چکی ہیں۔اسرائیلی میڈیا رپورٹس کے مطابق ایران کے حملوں نے تل ابیب اور بیت یام سمیت کئی علاقوں کو کھنڈر بنا دیا ہے، عمارتیں ملبے کا ڈھیر بنی ہیں، متعدد گاڑیوں کو بھی نقصان پہنچا۔تل ابیب، حیفہ اور مقبوضہ بیت المقدس سمیت اسرائیل کے کئی شہروں میں سیکڑوں لوگ بے گھر ہو چکے ہیں، رات بھر بمباری کے بعد صبح ہوئی تو لوگ گھروں کا حال دیکھ کر صدمے سے دوچار ہو گئے۔اسرائیلی حکام کا کہنا ہے کہ ایرانی حملوں میں درجنوں عمارتوں کو نقصان پہنچا ہے، متاثرہ سائٹس پر ریسکیو آپریشن اب بھی جاری ہے۔ ٹائمز آف اسرائیل نے لکھا کہ ہفتے کے روز اسرائیلی خوف اور افراتفری کا شکار رہے، وسطی اسرائیل پر رات کو ہونے والی ایرانی بمباری میں کئی اپارٹمنٹس تباہ ہو گئے اور کئی شہری بھی ہلاک ہوئے، جب کہ درجنوں زخمی ہوئے۔آئی ڈی ایف کا کہنا تھا کہ زیادہ تر ایرانی میزائلوں کو روک لیا گیا تھا تاہم کئی میزائل – جو بظاہر بڑے دھماکا خیز وار ہیڈز سے لیس تھے – تل ابیب، رمت گن اور ریشون لصیون میں گھروں پر گرے۔واضح رہے کہ ایران اور اسرائل کے درمیان گھمسان کی جنگ جاری ہے، ایران نے حیفہ، تل ابیب اور مقبوضہ بیت المقدس میں اسرائیلی تنصیبات پر آگ کی بارش کر دی ہے، خیبر، بدر اور عماد میزائل گرنے سے تل ابیب اور مقبوضہ بیت المقدس میں دھماکے اور سائرن کی آوازیں گونجتی رہیں۔دوسری طرف اسرائیل نے ایران کے مختلف شہروں پر کروز میزائلوں سے حملے کیے ہیں، بندر عباس، تبریز، اصفہان، ہرمزگان، کرمانشاہ، مغربی آذربائیجان نشانہ بنے، جن میں 30 فوجی اہلکار شہید ہوئے، اور پچپن شہری زخمی ہوئے، مشرقی آذربائیجان میں ایران نے اسرائیل کے 3 طیارے اور ڈرون مار گرائے، ایرانی حکام نے دعویٰ کیا ہے کہ دوران جنگ اب تک تین ایف تھرٹی فائیو سمیت 10 اسرائیلی طیارے گرائے جا چکے ہیں۔
