تہران میں قدس فورس کے ہیڈ کوارٹر پر اسرائیل کی بم باری

تہران(ہ س)۔گزشتہ چند گھنٹوں کے دوران حیفا اور تل ابیب پر ایرانی حملوں کے بعد، اسرائیلی فوج نے اعلان کیا ہے کہ اس نے تہران میں پاسدارانِ انقلاب کی قدس فورس کے ایک ہیڈ کوارٹر کو نشانہ بنایا ہے۔فوجی ترجمان نے کہا کہ ’فضائیہ کے لڑاکا طیاروں نے انٹیلی جنس اطلاعات کی بنیاد پر قدس فورس کے ایک مرکز پر حملہ کیا۔‘ ان کے بقول، ’اس مرکز میں قدس فورس کے اہل کار مشرق وسطیٰ میں ایران کے نیٹ ورک کے ذریعے اسرائیل پر حملوں کی منصوبہ بندی کر رہے تھے۔‘اسرائیلی فوج نے پیر کے روز سوشل میڈیا پلیٹ فارم ایکس” پر ایک وڈیو بھی نشر کی، جس میں ایرانی فوجی اہداف اور میزائل لانچنگ پلیٹ فارموں کو نشانہ بناتے ہوئے دکھایا گیا۔ اسرائیلی نشریاتی ادارے کے مطابق، فضائیہ نے تہران کے جنوب میں بیلسٹک میزائلوں کے مراکز پر بھی حملہ کیا۔ایرانی صدر مسعود پزشکیان نے آج پارلیمنٹ سے خطاب میں کہا کہ ملک کو اس وقت پہلے سے کہیں زیادہ اتحاد اور ہم آہنگی کی ضرورت ہے۔ انھوں نے اس بات پر زور دیا کہ اسرائیل قتل و غارت کے ذریعے ایران کو شکست نہیں دے سکتا۔ ان کے بقول، ’ایرانی افواج ان بزدلوں کے سامنے ڈٹ کر کھڑی ہوں گی۔‘پزشکیان نے مزید کہا کہ ایران اپنے رہبر اعلیٰ علی خامنہ ای کی پالیسی کے مطابق ایٹمی ہتھیار حاصل کرنے کا ارادہ نہیں رکھتا۔ ایرانی صدر نے امریکا پر الزام لگایا کہ وہ اسرائیل کی پشت پناہی کر کے بین الاقوامی قوانین کی خلاف ورزی کر رہا ہے۔ایرانی پاسدارانِ انقلاب نے اپنے بیان میں کہا ہے کہ اس نے نئی لہر میں میزائل حملے” کیے جو اپنے اہداف کو "درستگی سے نشانہ بنانے میں کامیاب” رہے۔ بیان میں کہا گیا کہ "ہماری مؤثر، درست اور پہلے سے زیادہ تباہ کن کارروائیاں اسرائیل کے حساس اہداف کے خلاف جاری رہیں گی۔ایرانی پارلیمنٹ کے اسپیکر محمد باقر قالیباف نے کہا ہے کہ ملک میں ’در انداز‘ یا’ایجنٹ‘ موجود ہیں جو اسرائیل کے لیے اندرونی حملے انجام دے رہے ہیں۔ ان کے مطابق دشمن کی ایک بڑی کارروائی فوجی نہیں بلکہ ان دراندازوں کے ذریعے کی گئی ہے۔قالیباف نے اس بات پر زور دیا کہ ایران کی تمام قومیتوں اور سیاسی طبقات نے’وحشی دشمن‘ کے خلاف متحد ہو کر مزاحمت کی ہے۔یہ بیانات ایسے وقت میں سامنے آئے ہیں جب اسرائیلی فوج نے پیر کے روز اعلان کیا کہ وہ ایرانی میزائل حملوں کی ایک نئی لہر کو روکنے میں مصروف ہے، تاہم کم از کم 10 میزائلوں کو نہیں روکا جا سکا۔ اسرائیلی امدادی اداروں کے مطابق، ان حملوں میں 4 افراد ہلاک اور تقریباً 74 زخمی ہوئے۔